هى وبختها …

كلمات الشاعر 

حمدى موسى

هى وبختها …

………………

محتاج انام علي صوت حنانها المنتظم

أنا ملتزم بالصمت لو كان فيه دفا

واذا اختفي

البرد ممكن يقلق الشوق… يزعجه

أو يخرجه م المملكة

واذا اشتكى الإحساس تداعى له الوجع

سابه ورجع لكنه راجع منهزم

محتاج اقولك كلمة أبعد م اللغة أعمق كتير م المفردات

يقف الشعور عاجز قصادها ومنكسر

المشكلة إن المشاعر نصها متعطلة

مش لاقيه تعريف تلبسه

ماشيين ف ضلمة من الحروف بيحسسوا

فالحب ناقص له كتير لم يكتمل

العلم ناقص تجربة

والحب واقف عند حتة معينة

طيب أنا مبقيتش قادر ..فيه ورم

عمال ف صبرى بينتشر. لازم لغة

تعبير بحجم مالوش صفة يشرح معادلة معقدة

النية لما تعرفه هتوزعه

واهو كل عضو ينوبه حاجة توجعه

محتاج اقولك حاجة انا مشتاق لها

مش عارف اقدر حجمها أو شكلها أو بعدها

حاجة كده كالغول والعنقاء والخل الوفي

بنورة بتنور وترجع تنطفي

كل اما احاول اروح لها الاقيها فجأة بتختفي

وكأنها بتعزف على وتر الحياة

والروح آلاتها وتختها

قررت اسيبها …تعيش …تموت….

هى ونصيبها وبختها

كلمات الشاعر 

حمدى موسى