كتير مع نفسى بتكلم …

كلمات الشاعرة …
عزة أحمدابوزيد ابوزيد

كتير مع نفسى بتكلم
والومها كتير
وبحكيلها وبجلدها وبشكيلها
وتعبت مني
ولاني ماليش غيرها
قولولى طيب اشكي لمين
ووجعي ماليني ومطول
ولو فكرت اعيشها ف يوم
يجيني الجرح م الأول
جوايا بيبكي مش قادرة
اطبطب حالي ولحالي
وسوء الحظ بقي يشكي
ويبكي بكايا موالي
مافيش ولا حاجه بإيديا
ولا قادرة اكون هيا
ولا اسعد حالي اتمني
ولو جاتلي السعاده ف يوم
تكسر فرحتي فى ثانيه
انا العايشه ومنسيه
وكاسرة بخاطرى وحديا
رشقت صوابعي جوه الشق
وقلت لنفسي مليون لا
وخليت الحياه بشروط
لا آمن يوم لأيها حد
وقلبى يخاف فى ساعة الضيق
مافيش غير نفسي ليا صديق
وبستعجب علي المخاليق
باعمالهم وافعالهم
والوم القلب لو جالهم
ف اي طريق
خلاص قفّلت ابوابي
وبالبنط العريض ممنوع
لا هبكي يوم فراق على حد
ولا هقدر أعيش موجوع

كلمات الشاعرة
عزة أحمدابوزيد ابوزيد