كان زمان وزمان كان..!!

محاسب …السعيد مصطفى عبدالله النحراوي

كان زمان وزمان كان
تركب على حمل البرسيم
فوق الحمار كأنك سلطان
تنام ف البيت والأبواب مفتوحة بكل امان
وست البيت تعمل من روث المواشي
وقود لأشهي والذ طعام
تسهر عند الساقية بالليل لوحدك ومعاك الرحمن
تاكل دهون اللحوم وجلود الطيور
وتشرب السمن البلدي بالفنجان
مفيش امراض مستعصية ولا حاجة اسمها سرطان
الأمهات يعملوا البسكوت وكعك العيد
ف البيت ف ليالي رمضان
لو قامت حريقة ف البلد
مفيش مطافى ويطفيها الجدعان
كان زمان الحب والشهامة والرجولة
والعفاف همه العنوان
وتشرب الحليب سخن م الجاموسة
قبل الشمس ماتشرق ع الأوطان
كان زمان تنام ويمر من جنبك التعبان
ولا يعضك لأنه شبعان
كان زمان فيه الصقر والنسر والغراب
والحداية والبومة وابو قردان
كان زمان يحترم الذئب الكلب الذي يحرس الأغنام
زمان السوبر ماركات تسمي دكاكين والقرص
تسمي بكاكين وتطلع رحمة ونور
ف المناسبات الدينيه ع المتوفيين للمساكين
والشتاء مطره كتير وبرده قليل
وسببه بناء البيوت بالطين
والصيف لطيف وحره خفيف
وهوا العصاري جميل وعليل
زمان لعيبة كورة موهوبين بالفطرة
وملهمش مثال وعباقرة ف كل مجال
زمان كانت الجمال تحمل المحاصيل والأثقال
ومثال للعزيمة وتعلم من صبرها اجيال
كان زمان يحفر الرجال اساس العمارة بالكريك والفاس
وتشوف الكلوو ف ايديهم وده للرجولة عنوان واساس
وست البيت تغسل الملابس ف الطشت وكان اسمه
تصبين وايدها تظل ناعمة كالميلامين وارقى م الألماس
وتحمل ع راسها البلاص ويجلس مائل
ومليئ بالماء ولا احسن ترمومتر حساس
كان زمان الطعمية اسمها فلافل والقمح اسمه غلة
والإبرة امها مسلة ومحدش يغتاب حد ويقول احنا بنتسلي
زمان كانت العيلة تتناول الطعام مع بعضها ع الطبلية
وده كان سبب اساسي ورئيسي
ف الترابط الاسري وحسن التربية
وتجد القطط جالسة بإحترام ومنتظرة نصيبها ف الطعام
كان زمان الطبيب اسمه حكيم والبريد اسمه بوسطة
والسواق اسمه اسطي والحلاق اسمه مزين
والكوافيرة اسمها ماشطة
والفطاررقاق ناعم وجبنة فلاحي وعسل وقشطة
والناس ف هنا وسعادة ومبسوطين اخر بسطة
زمان مفيش مبيدات زراعية ولا مزارع سمكية
والطعام طبيعي مية المية وشرب المية م الحنفية
والكل عايش سعيد وسليم وعايش عيشة هنية
ومفيش حاجة اسمها دروس خصوصية
وكان الأساس هوه وزارة التعليم والتربية
كان زمان مفيش مساحيق للوجه
والمرأه كالبدر ف ليلة التمام
ومفيش بناطيل جينز ولبس البنت اسمه فستان
كان زمان لما يتوفى انسان العزاء بيكون ثلاثة ايام
وكل اهل البلد يجهزوا الطعام ويذهبوا به للصوان
كان زمان الشربات الأحمر المحلى بالسكر للفرح عنوان
وكان الإحتفال بالأفراح كل ليله ف بيت العريس والعروسة
قبل الفرح بشهور م الأهل والجيران
زمان كان وكان زمان
ياتري كم انسان تمني ان يعود هذا الزمان كما كان

محاسب … السعيد مصطفى عبدالله النحراوي
جده فى 2019/1/11
1440/5/5