اقطاع سائد قائده جبار …

الشاعر … خالد موسى

شو بخبرك عن موطني شو صار
باعوا حقوق الناس بالدولار

شلة حرامية وسراقين
عا راسهم صراف مع سمسار

عاقسمة الجبنة متفقين
بلفقوا الاقوال والاخبار

وبحرضوا العالم باسم الدين
والدين عندهم ما الو اثار

وتزعموا من بداية التكوبن
اقطاع سائد قائده جبار

والغلا استفحل مع التخزين
يا مين يرضي زمرة التجار

هللي استغلوا الشعب متحدين
واسعارهم بتقص بالمنشار

لا في رقابة ولا موظفين
تراقب قانون البيع والاسعار

ما هم كل الناس جوعانين
مصيبة ابتلينا وكلهم اشرار

واستمروا بنهبنا من سنين
حتى ما خلوا بجيبنا دولار

وانهارت العملة يا رب تعين
ومعها انهارت دولة الشطار

لاضل فيها مؤسسات ومبن
قادر يهدي بهيك استهتار

لا حقوق لا راتب ولا تامين
لا مال لا مدخول لا زوار

ومقاطعة جبراننا الحلوين
خلوا امور بلادنا تنهار

وخيرة اطباء معلمين مهندسين
هربوا ظلم وانقطعت الاخبار

باعوا جناهم رزق وبساتين
باعوا الغلة والارض والدار

ومين يا مسؤول بدنا ندين
والكل ساهم باجيج النار

حتى نرجع هالبلد راجعين
نعلن الثورة نحشد الثوار

او ننتخب حكام موزونين
يوم الاستفتا في شهر ايار

الشاعر خالد موسى