كلمات الشاعرة … فاطمة علام
أصحى ياعم الشعر
تعالى وأسمعني
طرطأ ودانك بقى
وياريت تسمَّعني
حبة غزل من نوع
تنهييده مع آااهه
ورش على وشهم
شوية م البهارات
وحبة م السهوكة
واتصبُّهم فى كاسات
واطلع شويه لفووق
شوف لي سحابة تكون
حبلانة بالمعنى
وافضح شعور الشوق
إزعق وجمعنا
قول للبشر قوموا
وبلاش تصحي الوجع
والحزن وهمومه
هات الكلام صابح
من فوق سبع سموات
وش النهار جايب
قشطه وبلح أمهات
لكنه مش لينا
مرهون بكيس سكر
طبلية الأغوات
مليانه بالخيرات
والبيت كتب نعيه
فى صفحة الاموات
صوت الحنين زاعق
ع الجدة والعمات
ياليل مجمعنا
فين راحت النجمات ؟
ألفين نهار عدو
متلجمه جروحنا
وافراحنا يتعدوا
صاب الخرس روحنا
ياعم فوق واصحى
من حلمك المغشوش
قلمك طلع فاضي
متعبي بالفنكوش
ياااعم فارقنا
سيبنا لأوجاعنا
متكسره ضلوعنا
والناس كمان تايهين
لابيفهموا المعنى
ولا إيه بيوجعنا !!
فضِّينا أهو وبيعنا
وياريت تبلغهم
ينقطونا سكات
كلمات الشاعرة
فاطمة علام
Discussion about this post