مارس 3, 2024الحديثحواديت القطر … الرئيسية رواد الشعر الحديث حواديت القطر … كلمات معوض حلمي حواديت القطر … صفارة القطر آدان لوداع والبعد إن كان لساعات ، بيسيب أوجاع خداعه الضحكه اللي تداري الخوف بتبان ف عيون اللي مفارق والرعشه بتكشف ألف قناع فاتبان مكتومه الصرخه وانا واقف في محطة طلخا مستني القطر الجاي م المنصوره ورايح على بنها مش عارف أوصف تفاصيل الصوره الناس ملامحها غريبه الخوف على وش البنت بيغير لون البودره ملامحها طبيعي بتهرب مني اللون الأحمر قالب على بني الروج بيحاول يثبت على شفايفها واللون الأسود تحت عينيها كاشفها وعيون مش عارفه تركز في الصوره ورصيف بيلم عيال ف عينيها الأحلام مبدوره في الزحمه مشاعر بالتوره بتخلي العقل تملي يلف يدور والقاعد في الضلمه غير القاعد ف النور ووابور القطر الدايس ع القضبان داخل رهوان متأخر عن وقته شويه البنت أم فيونكه بتشاور ع العسليه فايجيلها بتاع الحمص حمص ،، حمص ياحماصه تشتري مصاصه وعيون بصاصه على واحده بتشحت ضحكه وتمد إيديها مذله ، والست الشايله الحله بتبيع للناس حواديت حواديت القطر مدارس عن واد فارس ،، بيعبي ف قلب البنت أمان فيبان في عينيها النور وحنونه عن واحد ندل بيدور على أي فرامل علشان اللمسه المجنونه عن واد طالع مهموم بالعيله والشيله على كتافه تقيله والعده اللي ف إيده أجنه وشاكوش في زمان اللقمه حلق حوش مالهوش ف الراحه ودايما متعفر اللون الأصفر على وشه بيهب عن واد رايق قاعد جنبه بقزقز لب عن واحد دفعه لابس بدله وكاب راجع بعد أجازته وشايل نوته الشوق بيشد عينيه للتوته شايل سر حبيبته ف شنطه عن واحد كان نازل طنطا ونام ف القطر وراح على أسيوط بياع الشاي المظبوط حاطط ف ودانه السماعه ووراه سريح بينادي على الولاعه ياجماعه أنا باجري على يتامى والحسنه بتمحي ذنوب ياما دوامة القطر الدواره بترص المخاليق ع الدكه وتفضي جيوبهم م الفكه وبتملى السكه مطبات واهو قطر وفات مليان أسرار مليان حكايات بيلف يحمل ركاب وينزل ركاب في محطه سيبك م المكتوب ع اليافطه الشاطر هو اللي يدقق إسبح جوا المعنى وطوف وافتح للكلمه حدود الشوف وشد الفكره من اللقطه ويشد الفكره من اللقطه …………………………………………… كلمات معوض حلمي شاعر عامية المقالة السابقة المؤرخون العرب وتاريخ أمة ... المقالة التالية كل شئ يشيخ ...
