أنا مش ملااااك …

بقلم دكتور … نبيل بكر 
أنا مش ملااااك
أنا بشر

أنا مش حديد
أنامش حجر

أنا روح زي أي روح
جواها الخير والشر

أنا معادلة خلقها ربنا
خلق عليها كل البشر

أغلط وأصحح الغلط
ولو دخلت معركه جايز
أخسرها وجايز انتصر

لكن عمري ما كسرت
خاطر ملهوف
ولا استخبيت ورا الشجر

أنا مش ملااااك
أنا بشر
أنا في عيوب
وفي مميزات تتاقل
بالدرر

وساعات يغلبني شيطاني
واعمل حاجات أندم عليها
واتحسر

عشان أنا مش ملااااك
ولا اتخلقت من طينه
غير طينة البشر

جوايا ضعف ربنا
خلقني كده
وكمان كده كل البشر

فيهم الكويس
وفيهم الوحش
وفيهم كبير الغجر

وفيهم الصالح
وفيهم الطالح
وفيهم ولا فشر

بلاش نحاكم بعض
على الخطأ
وبلاش ببعض نشهر

ونعلق المشانق
لبعضنا بحجج
من تأليف واحد أزعر

بلاش ندوس على بعض
وبلاش فى حياة غيرنا
نتحشر

من كان منكم بلا خطيئة
فليرمها بحجر

بقلم دكتور… نبيل بكر