بتحن لمين … ؟!

كلمات الشاعرة … رضا عبدالوهاب

بتحن لمين !!؟
ماهو طابت ليه الأيام من غيرك
ونساك يا حزين
واهو سابك تضرب أخماسك
ف اسداس تانييين
وبراح الحضن اللى ماساعك
اتفرشوا على الصفين بساتين
والشوك أهو رشوا على عتابك
تغرز وتدوس اوى ب كعابك
بخطاوى شمال … على توهة يمين
بينز أشواقه وحنينه عند الأغراب
وبيروى بوَار روحه التايهة بدخان نيكوتين
وبيشرب كاسه المتخمر .. ف حشايا عذاب
وبياخد سيلفي وبيزايد اننا راجعين
مين قال إن البعد بموّت
انا كنت بموت ف اليوم نوبتين
ولا مره نصبت عشانى صوان
لجل اما تلم بقايا المركون من ذكرى
على حبة أوجاع تايهين
ف بؤجة الأحزان
او دمعة ف يوم نزلت بالزيف
وقريت الفاتحة على روحى
او حتى يَسين
ولا زرت القبر اللى بنيته بايديك لي سنين
بتحن لناس كل أحلامها تتشاف لو صدفة
وتنظرها عيون ناس تانيين
ماتفوق ياحزين
الحلقة أهى ضاقت وبتخنق
والتوهة بتجرى وبتحلّق
وعاملى حويط
انفد بجلدك وبحالك
وان كان وسواسه أوحالك
الجنه ف قربه وترحاله
فالنار ف بعاده بميييت جنة
من امتى .. .. بيرموا كتاكيت
أو الجنة بيسكنها الشياطين
ماتفهم ياحزين

كلمات
الشاعرة رضا عبدالوهاب