تونسية وراسي عالي …

بقلم الشاعرة … عفاف الفندري

انا التونسية ..
أنا للة البية ..دوجة .. عويشة وسعدية
انا أم الزين الجمالية والجازية الهلالية
أنا الخضراء الثورية
خذيت القوة من عليسة والكاهنة البربرية ..
أنا عزيزة عثمانة ..بشيرة .. توحيدة ..
أم البنين الفهرية والسيدة المنوبية
أنا السمراء،. الشقراء والقمحية ..
رسموني في لوحات زيتية
أنا اللي خميس ترنان .. الشيخ العفريت ..
الجموسي والجويني تغزلوا وغناوا علية
أنا صليحة ..علية .. صفوة .. نعمة وصفية
أنا اللي الطاهر الحداد ألف كتاب علية
ومات بقهرته وهو يدافع علية
أنا بنت امس ..اليوم ..والحياة الجاية
نرقص على الطبل والزكرة والدربوكة
نعزف على العود والكمنجة والناي ..
نسمع محير سيكة والبياتي ..
السمفونية والموسيقى الكلاسيكية
أنا التونسية ..
بنت النخلة والزيتونة ..الاكليل والزعتر..
بنت البحر والصحراء والرمال الذهبية
بنت الجبل والغابة المسبية
بنت المدينة والحومة الشعبية
بنت الربض والزناقي المنسية
بنت الجابية والخابية والحنايا والفسقية
أنا القد والزين والعيون العسلية
نلبس السفساري .. والفوطة والملية واللحفة
والقفطان والكسوة العصرية
نحمر .. نقد الحرقوس والمردومة
الوشام والحنة ..
وبالكحل العربي نزين عيني
نلبس الوشوش .. الريحانة والخلال
والمقياس الفضة في أيدي..
انا التونسية..
ناكل زيت الزيتون وحويتة مشوية
نحصد الشعير والقمح من أرضنا البية
نحمش الطابونة ونخبز العيش
على الطريقة التقليدية ..
نحلب البقرات ونمخض الزبدة في الشكوة
ونشرب اللبن في الدرجية ..
نطيب كويس تاي على المجمارة
ونشربهولك بايدي ..
أنا التونسية .
أنا الزوجة والاخت والبنية
الاميمة اللي قلبي كله حنية
أنا الحبيبة اللي نعيشك أيام هنية
ناقف جنبك ..نسندك وماتخاف علية
أنا المهندسة .. الفلاحة ..المعلمة ..
الطبيبة وربة البيت المقدية
أنا المثقفة .. الشاعرة والفنانة
مش جاهلة ..امية ورجعية
نعيش بمبادئي حرة وقوية
نكون مناضلة وثورية
نحمل السلاح بين أيدي
ونقول لا ..
ندافع على شرف المرا المسبية
نعشق الالوان الزهرية ..
ومانغوص في السواد لعيني
ومانكون وعاء جنسي تافهة وسطحية
كيف مايحبوا ..وكيف ما قالوا علية
أنا التونسية …
شمالية ..جنوبية . شرقية .. غربية ..
ساحلية.. صحراوية .. جبلية .. ريفية ..
آنا .. أنا .. آني .. أني نايا ..نا ..
تونسية نتكلم القالة ..والقالة .. (g)
نفتخر بلهجتي البلدية والبدوية
نسكن الحوش ..الفيلا .. وبيت الشعر
يقولوا عربية .. بربرية ..امازيغية ..
ديما راسي عالي كيف النجوم تلالي
أنا هي التونسية ..بنت الخضراء ..
شامخة وابية …

بقلم الشاعرة عفاف الفندري
تونس … صفاقس