كل اما تنور تنور …

كلمات الشاعرة … دينا أبو زيد

كل اما تنور تنور
واشوف وشك كدة منور
مبقدرش أشيل عيني وابص
في حتة إلا عليك …..
وكإن ايديا ماسكة ايديك

ما هي….. أصل عينيك بشكل غريب
بتبعتلي الأمان تاني
وبلقى نفسي في وجودك منيش خايفة
وحاسة بأُنسِ من روحك
وتديني أمان تاني !

إحساس معرفش جايبه منين
واقول منين يودي لفين
وازي فجأة كدة استقويت
وبقيت مسنودة واستكفيت !

مبقاش يفرق كتير يعني
مين هُنت عليه ومين باعني
ده نُص الناس بنُص كلامي مش مَعنِي
والنُص التاني كان
فاكر قال إيه بعده هيوجعني !

خلاص طيب أنا هسكت ومش
هحكي كتير على فكرة
ده كل كلامي كان فكرة

تبع إحساس بتترجم
ودي كلماتي مرصوصة
وصعب لسة تتنظم

وكإنِّي طفلة ماسكة اقلام
بتدوِّن بيها أفكارها
بقالها يومين بتتعلم

لقيت نفسي ببص عليك
ومش باصة العيون غير ليك
فضلت اكتب وباصالك
واقول يمكن اكون دلوقتي في خيالك
وأكون طماعة لو اتخيلت
اكون دايماً كدة فـ بالك

وده إحساسي ولقيتني
مسكت بقلمي وكتبته عشان شُفتك …
وكيف حالك

كلمات الشاعرة
دينا أبو زيد