مـمـكـن …؟!

.كلمات الشاعر … علي فاروق
…….
ممكن تسيبني أمر ؟!
حالك ماعدش يسر
سيبني بقى في حالي
لو حتى ترحالي
مالقيتش فيه غير مر
……
إحنا ياسيدي إتنين
وما كنا يوم واحد
بالعكس في اتجاهين
بين باني والفاحت
وعشان تكون مرتاح
خليني أنا الجاحد
وإنت جميل وتسر
……
قول عني مافي الخمر
بدَّع ومايهمكش
قول إني طول العمر
غاوي النكد والنكش
قول إنت برضوا مالكش
في الهجر هوه أصر
……
خليك ملاك وبريء
ركب لك الجناحين
اوصفني وصف دقيق
إني شيطان ولعين
يعني استعيذ مني
إني خميرة شر

كلمات الشاعر
علي فاروق