دكة بيت ولآد عمي ،،،الشاعر… محمد حكم

دكة بيت ولآد عمي ،،،الشاعر… محمد حكم

الشاعر… محمد حكم

**********
يا دكه بيت ولآد عمي
يا زاهدة وشــاهده ع الحواديت
وحافظه البيت
وعارفه ملامح الشارع
ولا تُهتيش مع التغيّر
وعارفه الدرب والحارة
وعارفة الحي واللي فيه
وحي الحي راح لكن
سايب لك من ملامحه كتير
يا دفتر ذكريات يا ما
أنا التايّه من التفكير
وبشرد وانا وياكي
واطقطق ودني واسمع لك
ساعة مابقى أنا وانتي
يدوب صاحين
وغنيوه ف دكانه من الدكاكين
كأنها ليكي أو ليا أهي بتتقال
غريب الحي والغربه ليالي طوال
ف أرض الله أنا والآه بقيت جوال
عجوزه بس لســـــاكي
عفيه وحافظه جواكي
كتير أســــــــــرار
م كُل الخلق فاكراكي
وعرفا كي
وعارفه ان انتي ربيتي
وكبرتي
وخدتي ف حضنك الأحباب
وكُنتِ الواحة للأغراب
بس رفضتي وبشدة
مجاذيب دايره ف الحضره
وبيرُشونا بالتخاريف
أهو نوع برضو م التخويف
وكنتِ عارفه حقيقتهم
والغريبه كان سُـــكاتك
اللي أنا فكرتــــه طِيبه
ومزعلتِيش من القاسي
ولا اللي الدنيا لآهتهم
وأنا منهم
لكني بلف وارجع لك
وبتلقح من الهَــــــدّه
أفضي همومي جواكي
وأنا عرف مفيش فايده
واشوفك لما بتخبي
دموعك وسط بسمايه
واموت م الحيره إن أعرف
ومين قبلي عرف يقول ؟
بتبكي عليا أنا ولا
على عُمر خلاص ولى

يا دكة بيت ولاد عمي
سبيني أطل لك طله
ما هي الشله بقت قله
وعَز عليهم اللمَـــــــه
أديكي زي مانتي أهو
ولا فيش حد غماهم
دا احنا اللي بنتغمى
وبإدينا
تعرفيني أو يا ست ما تعرفيش
المهم والأهم إني عاشق
أيوه عاشق عُمرك انتي
و شكلك انتي وسِنك انتي
ف ما تلوميش
وأنا الدرويش ف محرابك
ونقطه ف بحر أحبابك
يا زاهدة وشــاهده ع الحواديت
دي لسه الغنوه ف وداني
وشـــــداني
وكُل شــويه برجع اقولها
من تانــــــي
أشـــيل الحمل واكتافي تقول صابرين
على الوعــده وع المكتوب وع الليمين
يا دكه بيت ولاد عمي
يا ريتني …أكون وفِّيت
********** الشاعر… محمد حكم