ابو ضحكه جنان ,,,,,  والحته الشمال

ابو ضحكه جنان ,,,,,  والحته الشمال.

بقلم نورا عواجه

تكمله للاعتراف بالجميل وبري بأخوتى
مينفعش ماتكلمتش عن أبو ضحكه جنان والحته الشمال ابو احمد الغالى ،
أخى وأبنى وصديقي محمود عواجه ،
والحقيقه أنا فعلا حسيت بالعجز للحظات مش عارفه أبدء المقال بأيه وأقول فيه أيه ، من كتر الصفات الجميله التى بيتصف بها أخى محمود ،
وعارفه إنى شهادتى فيه مجروحه لكن من يعرفه جيدا يشهد على هذا وربما يزيد ،

محمود يعنى الأبن والأخ والصاحب والسند ، يعنى الضهر والعزوه والعيله ، يعنى المحترم بزياده
المؤدب بزياده الخلوق بزياده
الخدوم بلا حدود ودون أنتظار المقابل ،
محمود يعنى السبع صنايع ..
يعنى دائره المعارف ال كلنا بنسأله فى كل حاجه وأى حاجه ،
يعنى المستشار فى أى أمر من أمور الحياه ،
يعنى بئر الأسرار من أصغر واحد لأكبر واحد فى العيله ،
محمود هو همزة الوصل مع الحج بغدادى
يعنى أى حد عاوز يقول حاجه للحج بغدادى وخايف انه يرفض أو يتعصب عليه ،
يكون محمود هو الوسيط والملاذ تجنبا للعواقب ..
وهو لها بحق ، فيتصدر لنا ويتحمل من أجلنا أحيانا مالا تحمد عقباه من الحج وهو مبتسم ،
ويبلغنا بنتيجة الحوار وهو أكثر تبسما ،
محمود هو ال بيكون لسه واصل من باريس بالليل والصبح تلاقيه على عربيه كارو يحمل البرسيم طعام الاولاد على حد قوله (قاصدا الغنم والبقر ) أو راجع من أمريكا وتلاقيه راجع من طاحون القمح يحمل الدقيق ، أو ساقطا فى حفرة المجارى أو صاعداً فوق نخله
دون ضجر أو غضب وأبتسامته الحنونه تعلو وجهه البشوش ،
هو ال تلاقيه يوم اجازته بيغسل المواعين ويجهز الغدا ويذاكر لاولاده علشان يخفف عن مراته جزء من أعباء المنزل ومعندوش أى مشكله فى ده ويقول هو أنا أحسن من الرسول لما كان فى خدمة أهله .
علشان كده ربنا دعاه لحج بيته. الحرام من غير حول منه ولاقوه عندما سافر فى مهمه رسميه تابعه لعمله بمطار الاقصر الدولى قبل الوقوف على جبل عرفات بأسبوع ، وأدى الفريضه بفضل الله ،

هو ال بينادينى يابابا فى الكلام وهو الأصغر منى سناً حتى يُشعرنى بمدى الحب والقرب والسند .وأنا والله لم أشعر يوما بأننى يتيمة الأب بفضل أخوتى وما يفعلوه من أجلى ،
وكم أنا فخوره ومحظوظه بهم ،

زمان وأنا صغيره كنت فاكره أن كل الناس هتموت إلا حد من أهلى
إلى أن جاءت اللحظه القاتله ورحلت أختى بدون أى مقدمات
فأدركت وقتها قيمة الاخ الشقيق ،

ولما محمود تعب بكورونا وكانت أزمة شديده جدا. علينا كلنا بنفس الدرجه
فضلت أبكى وأدعى ربنا أنه يحفظه من كل شر
متخيلتش شكل الدنيا وهو مش فيها ( هو فى طائر يقدر يطير وجناحه مكسور ؟! )

وكانت ومازلت دعوتى الدائمه ان يكون يومى قبل يوم أحد من أخوتى لان ربنا عارف أنى مش هقدر أتحمل الالم ده ،
وأستجاب ربنا لدعواتى ودعوات كل من سكن محمود فى قلبه ، ورده الينا سالما معافى ،
وهو ولا أزكيه على الله له نصيب كبير من أسمه ،
فهو ولله الحمد محمود فى قلوب كثير من الناس بأفعاله الطيبه ومواقفه النبيله وأحسبه (من الذين أختصهم الله بقضاء حوائج العباد ،حببهم الى الخير وحبب الخير إليهم أؤلئك الأمنون من عذاب يوم القيامه )

فيا أخى أسال الله العظيم رب العرش العظيم أن يمتعك بالصحه والعافيه وطول العمر فى طاعه
وان يبارك فى عمرك وعملك ويحفظك من كل شر ويحفظ زوجتك وأولادك
احمد ومصطفى وعبد الله ، وتعيش وتشوفهم أحسن مابتتمنى وتشوف أولادهم يارب العالمين ،

وأخيرا وليس بأخر ،
اللهم أخى اللهم سندى اللهم ضلعى الثابت ،