ولا المسافات …
كلمات الشاعرة
مرفت جابر
ولا المسافات …
…………….
ما فيش مسافات ..
ح تحجب هالة الأشواق
ولا العُشّاق ..
ح تمنع حضنهم مسافات
ولا حتى الزمن يقدر
يزيد البُعد تاني ساعات
ح يفضل دقّنا فينا
مكان يحضن خطاوينا
ونظرة شوقنا ف عنينا
بتسبق سرعة الأوقات
تبات روحي وقلبي يبات
مابين حضن الدفا حضنك
وفوق صدر الحياه صدرك
أعيش ويّاك بطول عمري
ورغم القرب ح اشتاقلك
واخبّط ع الوريد يفتح
أروح دوغري على قلبك
تغطّيني بدفا نبضك
وصوتك يحكي حدّوته
كأني الطفله ف عيونك
وجوّه القلب بسكوته
تغنّيلي على النوته
غناوي العندليب لسمر
أقوم ف وريدك اتمختر
واقول قرّب كمان أكتر
تقرّب قلبي يتكهرب
وازوغ منك وتمسكني
بطعم الحب تملكني
كأني بنتك النونو
كأنك ف الوريد إبني
واشوف قلبي بيسبقني
يقولّك كلمتين اتنين
ف واحده قلوبنا تتوحّد
وواحده غرامنا يملا العين
يزيد الشوق واشوف نفسي
باضُم عينيك تلات ضمّات
وباحلف مش ح يبعدنا
ولا الأيام
ولا المسافات
عشان دايما ما فيش مسافات ..
ح تحجب هالة الأشواق
ولا العُشّاق ..
ح تمنع حضنهم مسافات
…………………………………….
كلمات الشاعرة
مرفت جابر
