بقلم … نورا عواجه
ساعات قليلة ويبدء عام جديد كل عام وحضراتكم جميعاً بألف خير وصحه وسعادة وراحة بال يارب ، معروف طبعاً أن (بداية عام ميلادى) فرحه وهيصه على مستوى العالم وإستعدادات خياليه فى بعض الدول ، فى الوقت ال المفروض أن ( بداية عام هجرى) يبقى الأهم والأولى بكل الإحتفالات دى ، والأهم !!
إن كل تكاليف الإستعدادات الرهيبه دى تتصرف على الفقراء والمساكين والمحتاجين ، ولكن (أسمعت لو ناديت حياً ولكن لا حياة لمن تنادى) ماعلينا…
المهم أنا حبيت أبدء السنه الجديدة معاكم بدعاء بتمنى من ربنا يحققه ليا وليكم ولأى حد ، وهو أن ربنا يرزقنا بناس حلوة ونضيفة (مقصدش شكلها حلو ولا مستحميه ) أقصد حلوة ونضيفة من جواها بجد . وبحق وحقيقى ، يعنى بتحبك كده لله من غير هدف ولا غاية ولا طمعانه فى حاجه ، بتتمنالك الخير زى ماقال الرسول صل الله عليه وسلم(لايؤمن أحدكم حتى يحب لأخيه ما يحب لنفسه) وتفرحلك بأى خير يجيلك وتشوف الفرحه فى عيونهم ، ناس صافيه بوش واحد .
أه والله ، أرزقنا يارب بناس لها وش واحد بس !!
واللي تقوله فى وشك هو اللي تقوله من وراك .
أنا أكتشفت بعد العمر ده أنه أصعب حاجه إنك تتعامل مع الناس ال بوشين ، تبقى حضرتك بتتكلم وتضحك وتقول اللي جواك بكل طيبه ونيه صافيه ، واللي قدامك بيستغل ده بدم بارد وبمنتهى البجاحه .
يعنى تلاقيه بيتكلم عنك بناء على ضميره ونيته هو ؛ مش كده وبس ده كمان بينقل الصوره دى للناس ، وإحنا طبعا منتوصاش النمله عندنا بتبقي جمل ، ربنا يهدينا على نفسنا ويهدينا على الناس ، وأرزقنا يارب (بناس حنينه) حنينه بمعنى الكلمه .. أصل الحب الحقيقى والحنان بقوا عملة صعبه جداً جداً اليومين دول ، ناس لما تشوفهم قدامك تحس أن الدنيا لسه بخير ، ولما يكلموك تحس أنهم بياخدوك بالحضن وحضن حنيين أوى كمان ،
أرزقنا يارب (بناس طيبة وع الفطره) واللي فى قلبها على لسانها على طول ، لا بتلف ولا بتدور ولا بتحور ولا تعرف اللؤم ولا الخبث ولا النفاق . وأرزقنا يارب (بأولاد الأصول) المحترمين المؤدبين المتربيين واللي بيعرفوا العيبه ومستحيل يعملوها .
واللي بيحترموا الكبير ويعطفوا على الصغير زى ما قال سيدنا محمد صل الله عليه وسلم (ليس منا من لم يرحم صغيرنا ، ويوقر كبيرنا ويأمر بالمعروف وينهى عن المنكر ) اللي ليهم كبير وبيعملوله ألف حساب ، والناس ال بتحترم (الست) وتقدرها بجد ويتقوا ربنا فيها وبيعاملوها بما يرضى الله ، وأرزقنا يارب بأهل الخير اللي كل همهم ربنا وبس واللى مش بيحسبولها حساب ولا بيردوا محتاج ، اللي عارفين ومتأكدين أن ربنا عنده العوض وأكتر ، وعندهم إستعداد يصرفوا آخر مليم فى جيبهم مدام لله (من ذا الذى يقرض الله قرضاً حسناً فيضاعفه له أضعافاً كثيرة ) يقين ،
وأرزقنا يارب الصبر والبال الطويل .صبرنا على المحن والإبتلاءات ، وصبرنا ع الناس القاسية قلوبهم اللي معندهمش رحمة ولا يعرفوا معنى الإنسانية . وعلمنا نحمدك ونشكر فضلك ونعمك اللي نسيناها وسط الهموم وكأنها تحصيل حاصل .
مش عوزين نبقي زى القطط تاكل وتنكر . يارب أرزقنا الرضا باللي كتبته واللي أنت شايفه خير وإحنا مش شايفين ولا صابرين ولا فاهمين حكمتك ،
يارب أحفظلنا الناس الحلوه اللي بتحبنا بجد وبتفتكرنا وبتخاف علينا ، اللي بتصلى وقبل ماتخلص صلاتها تدعيلنا من قلبها وأحنا منعرفش ، باركلنا فى القلوب الطيبه الحنينه اللي شيلانا ومتحملانا بكل عيوبنا . اللي حاسه بكل الكركبه اللي جوانا ولسه واقفين جمبنا وساندين وماسبوناش نتخبط لوحدنا ومهما يحصل نلاقيهم فى ضهرنا ..
يارب أحفظلنا الآباء والأمهات والأولاد والأخوات والأصدقاء اللي هم عزوتنا وسندنا بجد واللي الدنيا متنفعش من غيرهم ولا ليها طعم ، وأحفظلنا صحتنا من الأمراض التى لا شفاء منها وأشفى كل مريض بيتألم وأنت وحدك العالم بحاله والقادرعلى تخفيف آلامه ،
يارب قوى الضعيف والأرمله والمسكين وقليل الحيله ، يارب صبرهم وقويهم وقدرهم على حملهم التقيل فى الأيام الصعبه دى ، فإنها والله أيام ثقال .يارب أرفع عنا الغلاء والبلاء والوباء ووسع أرزاقنا بالحلال ،
يارب زوج شباب وبنات المسلمين، وأرزقهم رزق فاطمه بنت النبي عليه الصلاة والسلام بسيدنا على ، وجمع كل القلوب المحبه واللي ناويه الحلال على كتابك وسنة نبيك ، يارب أجعله عام خير ومحبه وسعاده وفرحه وأمل يارب أجعلها سنه مباركه ، لا فيها حزن ولا ألم ولا يأس ولا فقدان ولا خذلان ، خلاص تعبنا وأستكفينا ، عشمنا فيك كبير تجبر بخاطر كل مكسور.
يارب أرحم كل اللي فارقونا واخدوا معاهم حتة من قلوبنا وروحنا ، وسابونا ناقصين كل حاجه يارب أرحمهم وأغفر لهم وتجاوز عن سيئاتهم ، وأجمعنا بيهم فى الجنه زى ما جمعتنا فى الدنيا ، وأرزقنا يارب من فضلك وكرمك زيارة لبلد نبيك وحبيبك محمد صلى الله عليه وسلم من غير حول منا ولا قوة فقد ضاقت السبل عند البشر ، ولكن سبلك لا تضيق ، وأرزقنا يارب جميعاً حسن الختام ، ولا تنسونا من صالح الدعاء وكل عام وحضراتكم جميعاً بألف خير وعام سعيد..
والسلام ♡♡♡
Discussion about this post