نهاية صابر الشقيان ومراته مقهورة راضي .. بدولة صناعة وتعبئة وتغليف قوانين الجباية :
خلاص يا عم صابر يا شقيان دفعت رسوم الملصق الإلكتروني ؟ وتمام يا عم صابر دفعت رسوم التصالح ؟ طيب يا عم صابر ادفع بقى رسوم تسجيل ملكيتك لشقتك لو حابب تغير عداد كهرباء أو غاز بإسمك ، ومش حندفعك كتير يا صبور يا حلو أنت يا حلو .. ده مبلغ رمزي خالص .. مجرد اتنين ونص في الميه ضريبة تصرفات عقارية من إجمالي قيمة شقتك .. وكمان يا صبورتي واحد في الميه لصالح نقابة المحامين .. ما هم إخواتنا برضو ومحتاجين دعمنا ، ولو قيمة شقتك يا صبربر تزيد عن مبلغ معين فإنت حتحتاج محامي غلبان كده تدفع له القرشنتين اللي يطلبهم ، وآخر حاجة بقى يا أصبر صابر وأشقى شقيان .. حتدفع ألفين جنيه بس رسوم للشهر العقاري اللي موظفينه حيتعبوا في مطوحتك على المكاتب وتعذيبك طول اليوم ، بعد كده هيص بقى يا عم صابر الشقيان لأننا حنضمن لك إنت ومراتك الست مقهورة راضي إن شقتكم اللي آوياكم وستراكم تبقى ملككم بشكل رسمي ، شوف إحنا جدعان قوي معاك إزاي يا عم صابر يا جميل ؟
وما تنساش يا صابر يا شقيان إنت ومراتك الست مقهورة راضي تسمعوا كلام عمكم أحمد موسى وهو بيقنعكم ويوعظكم ويحذركم يومياً في برنامجه ( على مسئوليته ) إن الحكاية دي زي غيرها من الحكايات السابقة بتصب في مصلحة المواطن ، ده راجل تبعنا حلو وزي الفل مالوش في النفاق ولا التطبيل خالص .
الله مالك يا صابر ؟ اتخشبت ليه ؟ الله الله وقعت على الأرض ليه ؟ إيه ده نبضك وقف ليه ؟ لا حول ولا قوة إلا بالله .. الراجل مات من الفرحة ، طيب نجيب بقى مراته مقهورة راضي علشان نفرحها هى كمان .. حقها برضو كمواطنة صالحة تفرح نفس فرحته .
( ضغط مالي عصبي نفسي متواصل مستفز .. ضغط لا إنساني .. ضغط مستمر دون هدنة لالتقاط الانفاس من دولة الجباية .. وإنا لله وإنا إليه راجعون .. الله يرحمك يا صابر يا شقيان إنت والست مقهورة راضي )
Discussion about this post