يا رحله صعبه …

يا رحله صعبه …

بقلم الشاعر … محمد عبد العزيز رمضان 

يا رحلة صعبه وبعيده

تاهت في بحر الليالي

والوقعه كانت شديده

مش لاقي غير سد عالي

أحلامنا كانت كبيره

والصعب فوق احتمالي

يا حكايه حلوه وجميله

يا خسارة مش مكتوبالي

يا هموم عليا طويله

رافضه تجاوب سؤالي

وسبتني وحدي في حيره

كان نفسي ألقاك يا غالي

يا رحله مالهاش نهايه

طفت بإيدها شموعي

وحاولت ألقى بدايه

تمسح قسايه ودموعي

ويا ريتها كانت معايه

تفرح بلحظة رجوعي

تفرح بقربي ولقايا

كانت نهايتي ووقوعي

يا رحلة من عمري فاتت

ورمتني في بحور غريقه

والضحكه ضاعت وماتت

والكدبه صبحت حقيقه

رغم الهموم بردو ساكت

خطفتني بعيون جريئه

وعدتني وفي لحظه خانت

قتلت وعودنا في دقيقه