كرباج ورا …

   كلمات الشاعر

 وحيد علي الجمال

كرباج ورا …

أنا مش هبرر غلطتي 

وأنكر وَكابر

واحبسني فيها وأضمها 

قال يعني ماكر

وأفتح جفوني واردها 

وأفركها ثاني في بعضها 

وأرجع وأعبي في بحرها 

مُر المواجع

أنامش راح أدخل خلوتي 

وأنا فيكى صايم 

وأعلني راضي ببلوتي 

و أحسبني صابر

دروشت نفسي بحبها 

وأنا لسه شايل ذنبها

هي الحقيقة وعكسها 

سميني عابر سميني فاجر

وغصب عني وعنها 

طلقت شعري منها

أعلنت نفسي بعدها 

بالشعر كافر

لازم تغير سكتي 

و أرسم لي خطة لقصتي

لسه مصدق عصمتي 

لما أعتكفت في ضلها

مصلوبة فيكي كدبِتي

ورجعت أفسر غلطتي 

نفسي بتشرب غيها 

فـِ كاس الجروح

ورجعت أردد اسمها 

والشرخ كاسر بعضها 

راسم وشوش تشبه لها 

والضل نازف دمها 

رافض يسافر بعدها 

يعمل عبيط يعمل نبي 

أنا جوه عمري السرمدي 

مستني وحيك يبتدِى

الموت بيحسب خطوتي 

إمتىَ هيقرأ فتحتي 

لسه الجنازة مودعة 

آخر ملامحك يا وطن 

من غير مايلبس لك كفن

مع أنه نهبك من زمان 

ومسجلك ضمن العَرب

فتش خصومك وافتكر 

أن الخريف ملهوش صحاب

و إن الفصول عاشت تخاف

مهما الربيع قدم لها 

جنة بيعشقها السحاب

لازم تخاف

الوهم في دماغك غبي 

عايش بياكل بعضه حاف

أنا مش هفتش في الرزيلة

ولا هبقى يوم صاحب فضيلة

اخنق بها درب الخيال

ليه دايما الصدق العبيط 

ملهوش مكان 

و لا سعر واضح أو ميزان

مالهوش في شعر السلطنة

كرباج ورا

قيس اللي فاضل من هواك 

بالمسطرة

لسه بتحلم بالمدينة الفاضلة

أنا نفسي مرة أكتب رومانسي

على قد عقلي بعتلي بيت

وقعني غفلة في شر نفسي 

ولبست فجأة في قلب حيط   

الشعر آخر معجزة ظهرت لنا 

جوه معابد حبنا 

لما اكتشفته العمر فات 

كرباج ورا 

   كلمات الشاعر

 وحيد علي الجمال