حصيلة سجال الملكة
مع الشاعر رمضان بقشيش
قلبي الحنين فابريكا
بيدق نهاوند وسيكا
تعب وزادت دقاته
محتاج صيانه وميكانيكا. سعاد
قلبي بيعشق فى جمالك
ايه اللى وداكي وجابك
ونسيتي تيجي فى معادك
همسح هواكي بأستيكا. رمضان
حبك أناني وشيكا بيكا
انا اللي شيلتك فوق الراس
هنده لابويا يوريكا
ازاي تعامل بنت الناس. سعاد
يابنت مالك مشغوله
ولا عشان بقى عسولة
تنسي هوايا وعذابي
هضيع وانتي المسؤولة. رمضان
رسيتني يومها على الفوله
تملي طيار ومسافر
في بيتي هبقى المسئوله
بشيل في همك وبعافر. سعاد
وهشيلك جوه عيون قلبي
واكشف لك كل اللي مخبي
عن حبي وشوقى واحلامي
انا عايز حضنك هنا جنبي. رمضان
يلا فارقني وروح على خالتك
ازاي بتقول لي تعالي جنبي
هفقع واطلع فى مرارتك
حلوة ودلوعه وايه ذنبي. سعاد
وبحب خفة دمك موت
دلوعة من يومك عارفك
هفضل احارب لو راح اموت
لحد ما توافق خالتك. رمضان
خالتي قويه ومش سالكه
كل النكد والهم تجر
المهر لازم والشبكه
الماظ يقوت من النوع الحر.. سعاد
سيبك من الألماظ الحر
قلبي دهب وحبيبك حر
هشيلك جوه روح الروح
عزيزة مهما زمانها يمر. رمضان
الحاله كتير مستعصيه
محتاجه إفاقه وإنعاش
وانا قلبي عاوز مداديه
مش قلب ملاوع غشاش
بطل بقى شغل الديناميكا
القصة محتاجه عتريس
مهندس قلب وميكانيكا
لو شافه القلب بقى يهيص
الشاعرة سعاد
Discussion about this post