ساعات و ساعات …
بقلم الشاعرة منى البابوري
” ساعات و ساعات ”
ساعات نحس روحي
ضايقة نفسيتي
و من كثر همي
نحلف ما نفارقها بيتي
و ساعات نهز عيني
للسماء و نتمنى
نشوف الحبيب
و ننعم بيها الجنة
ساعات فوق راسي
تعدي سحابة سودة
و نقول هذي آخر اياماتي
و باش نموت مكمودة
و ساعات نضحك
م الغلب و نخبي
و نقول عساها تزهر
أرض خضراء في قلبي
ساعات نبكي من الوجع
و ما نشكي
و لشكون تشكي
ما يحس بيك كان ربي
نخبي المواجع
و ندوس عليها برجلي
و نزيد نكتم صوتها
في قلب بالاهات معبي
نشكر حروفي
مشاركتني في ضيقي
و في وقت الشدة
هي صاحبي و رفيقي
و حتى القلم
مشكور ما خلاني
سنين و هو في غربتي
يعاني
و نزيد للورق نبعث
تحياتي
و نقوله مشكور يا ورق
صرت من ذاتي
انت الونيس في غربتي
ما تركتني وحداني
و طبعا ما ننسى دموع
العين
رفيقة درب ما تركتني
سنين
نشكرها و نبوسها
م العين
و نقول الف شكر
للي بكاني
برغم البكاء
كتبتها أجمل حروف
و معاني
بقلم الشاعرة منى البابوري
