رفض القلم يكتب …

كلمات الشاعرة … نورهان المغربي

————————————————–
كان نفسي أكتب فرحانه بس القلم مرضيش.
سألته ليه ياقلم؟
قالي اصبري يا نور يمكن متكمليش.
فتح الزمن دفتري
وقالي ليه هنا مكتبتيش؟
قولت أكتب إيه يا زمن وأبوح بإيه قولي.
أنا افتكرته قصر طلع قبر ونزلت فيه كُلي.
هي السعاده فين مترد وتقولي؟
كان ليا جده زمان كنت أترمي ف حُضنها وأشكيلها من همي
تقوم تبكي وتقولي يا نور اللي مشاف سعاده من أول حياته
مايشوفها يا قلبي لحد مماته
يعيش تعيس دمعه علي خده لحد مايوليِ.
الله يرحمك صدقتي في ما قولتي.
طبطب عليا الزمن
وقالي اصبري ياصبيه لو راح صبي في بداله ميه
يا ام الرموش السُمر اِتزيني ومن الشباك طُلي
تلاقي وقفلك شاب زين روحي عليه وهِلي.

أنا قولت خايفه يا زمن يُغدر كما غيره ويّوَلي
أمانه عليك يا جدع قبل ما تفارق تِقولي
ما أنا شوفت كتير وقبلك غيرك ماليِ
وانكسر قلبي من خليِ
واحبابي زمان هجروني وفاتوني أتألم.
أنا كنت بعيش عالمُره قبل الحلوه وعُمرى ما اتكلم.
أمانه عليك يا جدع تدارى سكينك ولما تنوى الدبح سنُه لاجل ما أتألم
كما غيرك دبح وجرحه لسه فالقلب معلِم

كلمات الشاعرة
نورهان المغربي