مشاعر حرجة

مشاعر حرجة

افتح شبابيك الروح للنور

دي حياتنا ماهيش سرداب مظلم

طب ليه نخليها بإيدنا قبور

ولروحنا نعيش دايما نظلم

ده العمر يادوب عز حلاوته

وكأنه يادوبك في بدايته

هنعيش نتهنى بتفاصيله ..

ولحد ما نوصل لنهايته .

لساها خطاوي العمر براح

على باب القلب وتلابيبه ..

ماتعيش أن شاء الله تكون سواح

والفرح من الحزن تجيبه

دي الدنيا حظوظ .. خلينا نفوز

ليه ترضى لعمرك تعذيبه ؟ .

مفاتيحك تقوى… تقوي الروح

ومعاها السر وأرقامه

ما تخلي الضحكة ريحتها تفوح

والحلم قوام علي مقامه

سيب نفسك رهن إشارة البوح ..

فليحيا الحب وأيامه .

ما كفاية غبار العمر كتير

ياما جرٌح عين كات مقفوله

وكتير ضحينا عشان الغير

وحياتنا اهي هانت بسهولة .

على باب العقل كتير حكايات

ماهو ياما القلب إترجي حاجات

وانا نفسي أكون مانحه لقلبك ..

أفراح وهبات .

واكون عاشقه ..

وف عز العتمه اكون نورك ..

وف عز الشمس مطر زخات .

و الوقت أهو فات ..

ما انا عاشقه هدوئك وملامحك

وبعشقي كان لازم أصارحك

افتح شبابيك النور للروح

وتعالى وروح ..

وأتمشي ف قلبي وجوه الروح

وأبني من العشق بلاد وصروح

أنطق وأعلنها وقولها لي

أنا عشقي من النوع المسموح .

أفهمني ودقق ف كلامي وأفهم معناه

طب ليه أنا وأنت نعيش مباراه ؟!.

فيها شد وجذب وف الاخر ..

هنعيش معاناه

ويضيع العمر وبإيدينا

بين حيرة وآه

ويتوه الحب اللي ما بينا

ونتوه وياه

ويتوه الشط ومرسانا وتضيع سفنه..

وبدال ما تجيب لي فَرح وشموع ..

هتجيب للقلب أكيد كفنه

وساعتها هاقولهالك علنا

إكرام القلب المتكفن .. هيكون دفنه ..

إكرام القلب المتكفن .. هيكون دفنه .

واتلقي عزاه…!!

كلمات الشاعرة / هيومه حمزة