كإن الدايره مقفولة
سلامه ابو النجاه
وآخر ضحكه في المصدر تقع في مخالب المحظور
أتاري الحظ مستكتر فتات الضي مش أكتر
برغم العتمه في الجوهر مازال في القلب طاقة نور
ولما الضحكه بتكركر
تكركر غم في الوجدان
وعطر عبيرها يتبعتر
على الأشجان في كل أوان
يموت الدمع في عيونها
يا حابس نبض تكوينها
برغم براءة المظهر
مسير بركانها بكره يثور
مازال الحلم متجنزر
في أعمق قبو في الكوابيس
وصرخة آه ماهيش قادره
تشق طلاسم التضاريس
لعل الصوره محصوره
ما بين العاميه والعوره
في كلمة حق محشوره
وبتعافر في حلق الزور
كإن الدايره مقفوله
على الأوجاع في مركزها
وبنت المايله معدوله
بتتعايق بعكازها
لإن الصوره مقلوبه
تبان الفايزه مغلوبه
يا رافع طوبه فوق طوبه
ما تتغرش بعلو السور
تموت النظره في المنظر لتحيا ملامح المنظور
وآخر ضحكه تتعثر في كل مخالب المحظور
………………………………………
كإن الدايره مقفوله
كلمات الشاعر
سلامه ابو النجاه
Discussion about this post