« لمّا عينيك » للشاعرة مرفت جابر

كلمات الشاعرة

مرفت جابر

لمّا عينيك …

لمّا عينيك بتبُص ف عيني

باجري اتدارى مابيني وبيني

خايفه الشوق النايم يصحى

على صوت النبض ف شراييني

خجلي بيمسك ورد خدودي

قلبي بيجري وينحاش صوتي

باسرح بين إحساسي بموتي

وما بين نظرة عين تحييني

لمّا عينيك بتبُص ف عيني

باشعر إن العالم فاضي

ومافيش غيرك ومافيش غيري

بانسى عذاب الزمن الماضي

وارمي ف إيد الحب مصيري

واجري بسرعه أروح لمرايتي

أتمكيج واعدل تسريحتي

عيني تبص تقوللي ارتحتي

أضحك ضحكه تساوي سنيني

لمّا عينيك بتبُص ف عيني

أخرج من إحساسي بنفسي

وما احسّش غير بيك وبحبك

وتاخدني الأحلام من يأسي

تبدرني جناين على حضنك

وف ثانيه الأزهار تتمد

على صدرك بين جزر ومد

ونهار ما يمرجحني البرد

دراعاتك تيجي تدفيني

لمّا عينيك بتبُص ف عيني

تفاصيل الأحاسيس مكشوفه

وتزيد لمّا الحب يميل

وانا من وصف الشوق مكسوفه

طب ح اعمل إيه ف التفاصيل

أنا ح اسكت مش ح انطق خالص

رح اغمّض واحلم بنوارس

وح اسيب الإحساس الحاسس

يوصفلك ف سكاتي حنيني

لمّا عينيك بتبُص ف عيني

مش ح اقدر على وصف مشاعري

ولا ح اقدر على أي كلام

د انا لمّا تملّس على شعري

باسرح ييجي ساعتين قُدّام

أومال لما ح تلمس إيدي

أو تقطف من ورد خدودي

كل فصول السنه على عودي

رح اشوفها وف الحال ح تجيني

لمّا عينيك بتبُص ف عيني

كلمات الشاعرة

مرفت جابر