ربا علي تكتب بكرا

بكرا إذا فتّح ورد
ع دروبنا وصلّى
عنّو لَ تتخلّى***

خلّيك متل الدالية
ع دْراج هاك البيت
عم تحضن عناقيدها..
وتنام ع السكّيت.
خلّيك متل الأم بعيونا غفي
كلّ الحنان وما طفي..
وتتشوفك الإبن الوفي
مَ بتترك محلّا***

ومتل الصبية الْ شافها
نبض الهوى وماعافها
بتشوفك بقلبا دني
وحتّى الدّني ما تنحني
رح تشقلك ع كتافها
وبشفافها
ترسم تراتيل الهوى
ويبقى الحنين لْحافها
الْ فيه الدفا تجلّى**

بكرا إذا فتّح ورد
ع دروبنا وصلّى
عنّو لَ تتخلّى
وأوعا بإحساس الورد
مرّات تتسلّى***

خلّيك متل الرابية الخضرا
عطر الربيع معشعش بصدرا
بترابها خير الدّني مزروع
وع جْوانحا غفّى الحلا الله***

…رباب علي /سوريا