فراق القلب

وفراق القلب المنحوت

من كتر الآه اللى بتوجع

خلجات الروح

يشبه ورقات التوت لما بتدبل

ترميها الدودة اللى بتغزل

بغدَاها حرير

مالهاش عوزة تتكسّر فوق الطرقات أهو يشبه مكنونه وحالها

بعد فراقه الملعون

وبوَشوش شجر الياسمين

وبحلِّف ورقه اللى مازال

أبيض كالبدر

ايه طعم الغدر ؟!

طب ريحته بتشبه برفانك ؟

سافر … وف ايده سلام بايت

مرسوم على كفه المتحنى

بوردات خدى لما بتتلون

ساعة ما بيطبع شوقه على ملامحي ويتلخبط لوني الوردي

بلونه القمحي

وقلبى المفحوت ، بيبعتر فحته وبيلمه ويجمّع ف آيات عشقه المرصوصة جوا البتارين

تمثال واقف مستني حبيب

بينادى على الغايبين عمداً

ويغيّر كل يوم ف أماكن وهدوم

ولا جاش اليوم اللى حبيبه

يتمنى لقاه

مع انه عشانه اتحول وجعه لمانيكان

ومازال الضلع المعووج جوايا

مشتاق للضمة اللى تلخبط

كل الموازين ويحس ف خنقة أيامه انه انسان …

فراق القلب اللى تحبه ..

كسكرات الموت

تطلع روحك وتظل متشعلق بإيديه ويسيبك رهن لأحزانك

مرهون ف تابوت

انا كنت شايلاك لقلبى شاشة

وبلسم لجروحى

طلع هواك كافر ومالوهش ف الجنة

والحنة طلعت مغشوشة مابتطبعش

مين قال إن الفرح كوشة

وفستان دانتيل

مالبست الفستان والطرحة

طلعت جارحة ومابتسترش

يافراق خيِّم وفرد طوله

بطول الليل وكوابيسه

وشياطينه وأباليسه

وعين الشمس

ياحب مازال كحب الأمس

افرد حبال رجعتك ضفرّها واعقدها

وارميها ع السكة

شد قلوع روحى واسند وتد قلبى

البعد أكبر ذنب وكُفر للعشاق

وأنا مؤمنة بحبك

وكافرة بأى فراق ✋

كلمات

الشاعرة رضا عبدالوهاب