ومش محتاج …

ومش محتاج …

بقلم الشاعر … محمد عبد العزيز رمضان

ومش محتاج أكون موجود

لأن وجودي مش همك

شبعت كلام سلام ووعود

دا ذنبي يا ناس ومش ذنبك

فرشت طريقي ياما ورود

وصعب أعيش بعيد عنك

طريقنا كله شوك وسدود

وقلبي تعبني آه منك

ومش محتاج أكون وياك

لأن القرب منك نار

خلاص مش ممكن أستناك

ومنك دقت ويل ومرار

ياريتني ما عشت لحظه معاك

ياريتني كنت خدت قرار

وعشت سنيني وأنا بهواك

رمتني في بير ومالو قرار

وقلت حبيبي روحي فداك

وتهت معاك بقيت محتار

ومش قادر كمان أنساك

ولا ابني ما بنَّا حتى جدار

وكان الكدب هو دواك

وقلت خلاص ما فيش إنذار

ولو حبك ما كنش أذاك

وكان لطريقك أنت أختار

بقولك روح ومش ريداك

بلاش تكدب بلاش إنكار

حاولت كتير ومش حاساك

ومش هقبل تقول أعذار