الحب تقريبا يقييييين …

كلمات الشاعرة 

باكينام حمزه

الحب تقريبا يقييييين …

……………………..

قولى مين يرفض هواك

مين الغبيه اللي تبقي ف قلبها وتسيب هنا وتروح هناك

مين اللي نغمة لحنها تبعد عن القوس والوتر

وتسيب غناك

أصل الهوى لما يصيب

الشمس مش ممكن تغيب …

والروح تجيب العمر من قلب الهلاك

والوش يتحول ولى زاهد ومش طالب حياة

الصحرا عشقت شمسها أخدت سمارها ف حضنها…..ايه اللي جابك عندها تزرع خضار

مين اللي قالك قلبها ناقص نهار

الروح علي مرمى البصر كانت بتستناك هوى

كانت بتسعى بين صفاها وحملها….

كت مؤمنة إن الأمل إبن الحقيقة..إبن بار

عارف تاريخ الفضفضة ؟

أيام ماكنت مغمضة الأفكار حنين

أيام ماكان الحب بيننا وبينه آلاف السنين

قبل الكتب والممكنات…وانت بعيد عن خيال المفردات

أنا كنت برضو باعشقك …..

ألا انت جيت لى صحيح منين

أنا كنت محتاجة لنبي وحقيقي كنت ممهدة لملاك يقول لى قربي

لشعور ياخدنى لمنطقة فيها كفوفه حنينة يملاها ويقول اشربي

أنا كنت فعلا عاوزه درجة محسنين

أنا عندى قلب وعندي دين..

لكنى كنت على حدود المعصية

روحى يادوبك مؤمنة…

والحب تقريبا يقين.!!!

الحب تقريبا يقييييين .!!

كلمات الشاعرة 

باكينام حمزه