إياك تخافي
مدي إيدك يا حبيبتي
و اجبري كسر الأمل
إروي الشجر
خليه يرعرع
يطرح في قلبك جناين رطب
ليني قلب الحجر
إخلفي كل الظنون
زيحي الغيوم
و اغزلي من شعاع الفجر
توب ابيض حنون
يا حب عمري
كل التعالب طماعين
طمعانين فيكي
واقفين على بابك متخفيين
مترصصين
متربصين ليكي
من بعيد ل بعيد
مستنيين لحظة وقوعك
راكبين فوق كتافك
بيمصمصوا ف دمك
لاجل ينبتوا و يطلع لهم ناب
ف يعروا لحمك
و يزودوا ف همك
واخدين من غز السنين لبلاب
لاجلن يوصلوا
و يتحكموا فيكي
خوفيهم و اياك تخافي
او تفتحيلهم أي باب
الله معاكي يا حبيبتي
وصى عليكي الأنبيا
و مذكورة في كل كتاب
كلمات الشاعرة
وفاء يوسف
