عارفه معنى الحب إيه ؟
بحبك إذن انا عايش
***************
انا عايشك … و عايش كل تفاصيلك
ثواني العمر على علشانك
أمني النفس بوجودك …
و اشوف الدنيا بعيونك
و لما انعس اشوفك حلم صحاني …
و خدني ف قلبك الحاني
و في وداني / ٱلاقي صوت بيندهلي …
يهنني و يطرح مني أوجاعي …..
و يجمعني انا و أملي
و اقوم من نومي و استقبل ……
جمال اليوم …
و اعيش اللحظة و اتمنى ……
معاكي تدوم …
ف أشيل الصعب لو يصعب …..
عليكِ الشيل …
و اخلي العسر متيسر ….
في كفك سيل
و طول الليل أناجيكِ …
و جنبك تحت رجليكِ ….
البي وقبل ما تقولي ….
تكون الدنيا في ايدكِ
أزيح الهم لو قرب …
ازيد من فرحك الاطيب
و اصد عزولك الأحدب …
بحبك يعني مش ب ازهق …
كإن المعنى من حبي …
انا عايشك عشان اعشق
و خلي الخلق يتعلم …
يدرس حالتي و يحقق …
وتبقى الدهشة من حبي
غرائب صعب تتصدق
بحبك يعني في الأساطير …
كلام تكراره 100 مرة …
ما بين عبله و بين عنتر
جميل كان حبه ل بثينة
ما بين چوليت كان روميو
ما بين كليوبترا … انطونيو
لكني ف حبك الاكتر …
انا الأعمق انا الاذكى …
و لذة شقوتي انقى
في حبك يا خليلة الروح …..
انا ارقى انا عايش …
و عمري ما اكون على الهامش …
و كل ما فاتني من عمري
دا مش محسوب …..
زمن مشطوب
زمن طايش
بحبك إذن انا عايش
****************
كلمات الشاعر
محمد جمعة
Mohamed Gomaa
