.. كلمات الشاعر
همام ابراهيم
متكمليش نص الكلام
متمتيش بعيون حزينة
وهاتى ميت مليون وجع وارمى السلام
شدى روحك
وامشى قبل الروح ماتمشى
وسكى باب الدنيا وامشى من سكات
سيبى حزن وذكريات…
سيبى ليل سهران فى روحى
وحكايات
يسهر يذاكر غنوته ف حضن النايات
مرهون بشمس!
سيبى وردة فى روحى من فضلك، وهمس
سيبى شمس
وسيبى ضله
سيبى من ريحتك حاجات!!
أو متسبيش
مش فارقة جدا..
عادى خالص..
مش فارقه خاالص
عادى جدا
بس انت لية بتلمى وياكى النجوم؟!
الدنيا بتضلم ساعات!!
طب سيبى نجمة منورة فى الليل عشانى
متخديهاش..
هكتب عليها الشعر واتمناكى تانى
وادفن جراحى و وحدتى
فى الوحدة تانى
ويكون فى علمك ياقمر
كل اللى ميت فى القصايد
عاش…
وانا بردة حد ميتنسيش!!
حد فى كيانه المختلف
قادر يعيش
وخلى بالك عادى جدا
مش فارقة طبعا
ميهمكيش..
ومتحزنيش
منا قلتلك يوم م اتقابلنا متضحكيش
أو اضحكى
دا الضحك من غيرك مفيش
وانا ضحكتى فاصلة فى كتاب الموجوعين
وبتنكتب مليون كتاب
ومتتـــقريش
عارفة ياعيون الحزين
عارفة لغة “الميجاهرتز”فى الإذاعة
مش حكايةتجيب حكاية؟
مش فاصلة بتجيب الأغانى
وفاصلة بجيب النكات؟
فاصلة بتعد الوجايع
تانية بتصحى النيات؟
وتجيب سكات
وتجيب قصايد شعر زعلانة وحزينة
ومزيكات
وفاصلة تبكى على اللى فات!!
فاصلة بتعد الشروخ
فاصلة بتحد الجروح
جرح ميت _جرح عايش _طعنة بتفكر تموت
ضحكة بتدارى الوجع
فمتحزنيش
شىء عادى يعنى مهزنيش
وبلاش عتاب
فى الفرقة مش نافع عتاب
بس انت لية بتوقفى مرور السحاب؟
والبحر مبيضحكش ليه؟
والشوف ضباب!
مرسومة صورتك ع الحيطان
مرسومة فى ضلوع الرخام
مرسومةليه ف أى اتجاه؟
بشويش
بشويش أوى
متودعيش
مقدرش أقول لعيونى ننك مش هنا
هاكدب واقول للقب دقاتك هنا
هاكدب واقول للقلب إنك ممشتيش
وسلام سلام
متكمليش
واستسمحك
بلاش تجينى فى المنام…
يمكن أعيش…
كلمات الشاعر
همام ابراهيم
Discussion about this post