كلمات 

الشاعرة … يامنه اليمنى

وجع الغربة

لا الدم ده دمى

ولا ناسها فِهمونى

اشتقت أنا ل أمى

عاشق سمار لونى

هافرد شراع الشوق

وهاسمى و هاصلى

هاركب بساط الريح

ياقلبى حصَّلنى

على بلادى هاطير 

يارب وصَّلنى

اشتقت ل احبابى

ولبنتى ولولدى

ولكل أصحابى

ولعزوتى وسندى

واشتقت لك أكتر

والله يا بلدى

اشتقت لترابها

ونخيلها ولنيلها

اشتقت انا وراجع

حالف لغني لها

يانخلة ياعالية

فوق ف السما تسبَّح

الأصل ده طبعها

فيها الجريد سبَّح

من بعد عتمة ليل

طلع النهار صبَّح

والساقية فرحانة

عمالة تتمرجح

يانيلى ياجارى

زيك ما شفت مثيل

تروينى انا وجارى

عمرك ما كنت بخيل

تسقى الطيور والشجر

خيرك وفير يا نيل

وصبيَّة زى القمر

عاشقة غٌنا المواويل

جاية معاها الخير

بتغنى عينى ياليل

واهى ماشية تتمخطر

خيرك وفير يا نيل 

فيك الكرم أكتر

مشيوا كتير عاشقين

على شطك الأخضر

قاعدين بيتأملوا

فى حلاوة المنظر

وأنا وحدى ف الغربة

باكل وباشرب ذل

إشتقت لك يامصر

يا أمى يا ست الكل

الغربة مهما وصفت

أيامها بتطول

ياريتنى ما اتغربت 

وسافرت م الأول

       كلمات 

الشاعرة … يامنه اليمنى