حكم القدر

كلمات الشاعر …
عبدالله على نظير

حكم القدر واجب نفاذه الصبر
واللي رضي يثبت رضاه بأيات
ممكن تيجي له بشارة نص العمر
ممكن يعيش وتبان عليه كرامات
مفتون بسحر الفاتنات مجذوب
وبخاف أخطي برجلي ما ارجعشي
وكتير بسيب الباب يبات موروب
لو طبلت قول فص ملح وداب
يا أيها النص اللي بات كداب
توب الشباب دايب على كتافي
وانا باعترافي رافيه بكام رقعة
تظهر عليا في ساعة السـقعة
والفولتارين بحتاج له يوم ورا يوم
دقني اللي دب الشيب وطقطقها
بنت الذين سلاح وله كام حد
فيها الوقار اللي يجيب ويشد
وفيها اعتراف أن البدن سلم
لكن لساني الفقري لو سلم
بيجرني ويجرجر الشياطين
يا مشبطين الرغبة في كلامي
ومشطبين على كل احلامي
ومشتتين الصورة مش شايف ..
غير المناطق بنت طين الجان
ما اصعبك من امتحان عملي
كل اللجان قفلت علىيه الدور
ورقة اجابتي اتبقى فيها سطور
لكن إيديا رافضة تكتب حل
وايه اللي مش لازم عشان يتحل
ابعد اخاف اهرب اسيب خالص
يرجع روتيني من ملل لأمل
ذاتي اللي محتلة بميت محتل
قد أيقنت إن احتلالها مباح
وان المقاومة مش هاتفرق شيء
إلا ساعات مالعكننة والضيق
يا قلبي لو هاتطيق مانيش طايق
يا بدني لو هاتنخ ما تكملش
عيش الحكاية ولا خاف ما تعش
وما تتربطش بأي حبل لجام
ابسط ما فيها عيشها حتى كلام
واوصل سلام نفسك رضى وسكون
واقفل عليها التوهة والذلات
يمكن في يوم تظهر عليك كرامات

كلمات الشاعر
عبدالله على نظير

AbduAllah Ali Nazeer