الابنودى يكتب…يامنه

الــرواد نــيــوز

والله وشبت ياعبد الرحمن عجّزت يا واد ؟
مُسرع، ميتى وكيف؟
عاد اللي يعجّز في بلاده
غير اللي يعجز ضيف
هلكوك النسوان ؟
شوفتك مرة في التلفزيون
ومرة وروني صورتك في الجورنان
قولت : كبر عبد الرحمان.!!
أومال انا على كده مت بقالي ميت حول.!!
والله خايفة يا وليدي القعدة لتطول
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية وباين هاحيا كمان وكمان.
عشت كتيير
عشت لحد ماشفتك عجّزت يا عبدالرحمان.
وقالولي قال خَلَّفت
وانت عجوز خلَّفت يااخوي؟؟
وبنات..!!؟
أومال كنت بتعمل إيه
طيلة العمر اللي فات؟
دلوقت مافوقت؟
وجايبهم دِلْوك تعمل بيهم إيه؟
على كلٍّ أهي ريحة من ريحتك عالأرض
يونسوا بعض
ماشي يا عبد الرحمن
أهو عشنا وطولنا منك بصة وشمة
دلوك بس ما فكرت ف يامنة وقلت: يا عمة؟؟
حبيبي انت يا عبدالرحمان
والله حبيبي .. وتتحب.
على قد ماسارقاك الغربة
لكن ليك قلب.
مش زي ولاد الكلب
اللي نسيونا زمان
حلوة مرتك وعويْلاتك
والاّ شبهنا..؟
سميتهم إيه؟
قالولي : آية ونور.
ماعارفشي تجيب لك حتة واد؟
والاّ أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور.!!
ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان.
آ..با..ي ما مجلّع قوي ياعبد الرحمان.
طب ده انا ليّا ستّ سنين
مزروعة في ظهر الباب
لم طلّواعلينا احبه**** ولا أغراب.
خليهم..
ينفعوا
أعملهم أكفان.!!
كرمش وشي
فاكر يامنة وفاكر الوش؟
إوعى تصدقها الدنيا..
غش ف غش.!!
إذا جاك الموت يا وليدي
موت على طول.
اللي اتخطفوا فضلوا أحباب
صاحيين في القلب
كإن ماحدش غاب.
واللي ماتوا حتة حتة
ونشفوا وهم حيين..
حتى سلاموعليكم مش بتعدي
من بره الأعتاب
أول مايجيك الموت .. افتح.
أو ماينادي عليك .. إجلح.
إنت الكسبان.
إوعى تحسبها حساب.!!
بلا واد .. بلابت..
ده زمن يوم ما يصدق .. كداب.!!
سيبها لهم بالحال والمال وانفد
إوعى تبص وراك.
الورث تراب
وحيطان الأيام طين
وعيالك بيك مش بيك عايشين..!!
يو…..ه يا زمان..
مشوار طولان
واللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.
مش كنت جميلة يا واد؟
مش كنت وكنت
وجَدَعَة تخاف مني الرجال ..؟
لكن فين شفتوني ..؟
كنتوا عيال.!!
بناتي رضية ونجية ماتوا وراحوا
وأنا اللي قعدت.