سلامة قلبى م الربكة

كلمات الشاعرة … رشا الفوال

سلامة قلبى م الربكة
وم السكة اللى ماتوصلش
سلامة عيني م العتمة
وم الكلمة اللى ماتحصلش رعشة قوس
كمان الدُنيا بيعيط
عشان إيدك تمُر برقة ع الأوتار
نغم جبار فـ لمستها وشوق صبار لجنة خُلد
عرفت السُهد إيه هوَّ؟
وعشِت الوجد من جوهَّ ؟
وطُفت الخوف
ماخفتش ليه ؟
وتفرق إيه تراتيلك عن النزوات
وتفرق إيه دموع عينك عن اللذات
حاجات النفس مطلوقة تقولك ” هات ”
وعامل روحك إنت حزين ومش شايف
ومش سامع صدى صوتك
ولاعارف تراضيِ فـ مِين
أقولك مين بيستنىَّ ويتمنىّ بشوق مهووس
وعارف صوته بيشدك
ولا يهمك
“كمان” الدنيا بيخبي فـ ضلعه القوس
ويوجعنى
ويمنعنى أدوق ريقك عشان بلسم
ويمنعني أفوت ريحك عشان مُلهِم
ويحجب عنى تكشيرتك وألحانها
تدوب نفسى فى حرمانها
فتوهب قلبى للمقامات ” عجم ” و” مانيير ”
وتوهب روحي سُكانها بكُل ضمير
ولا يهمك
وعيش إنت
وسلم بس فى البدايات
ورتل جنب قلبى آيات
وسيب الباقى فوق كتفى أنا أدُه
_____________
كلمات الشاعرة
رشا الفوال