الشاعرة هيومة حمزة تكتب قلب حي

قلب حي
….. ….
مين اللى قال إن النفوس مابيضعفوش
ولا القلوب يوم للأمل ما بيحتاجوش
و إن المشاعر جوا منا
تتحسب حبة رتوش
مين اللى قال كل القلوب …
بالوقت تتحول حجر ؟
ياما فيه قلوب خالية العيوب
تايهه ما بين ظلم البشر
وف وصفها تشبه طيور
ورقيقه رقه الزهور
قادره أكيد تطرح أمل
في نظرنا دايما يكبروا ما بيصغروش .
انا شَعرى شاب واهو شِعري غاب؟
لكن شعوري ب الأرتياب
ممكن في ناس ما تحسهوش
وبرغم صعوبات الحياه
لسه جوايا حنين … وحاجات كتير رغم الألم ما بيموتوش
جوايا قلب…
اقل حاجه … تفرحه
جوايا عشق.. الخيانه بتجرحه
جوايا شوق اكيد في حضن بيوحشه
فيه حد فيكم… الحنان ما بيوحشوش؟؟

كلمات الشاعرة
هيومة حمزة

باكينام حمزه