تهبيس بقلم الشاعر سامح السبكي

تهييس
،،،،،،،،،،،،
معقول أنا توهت من العنوان؟؟!
،،،،،،،،،،،،،،،،،،،،،،،،،،،،،،،،،،،،،،،،،،،،
معقول أنا توهت من العنوان؟؟!
ودخلت في حالة من النسيان
ودا كله بسبب اللي أنا شايفه
من أهل وصحبة ومن خلان
طب دا اسمه كلام والنعمة حرام
دي سنين وأنا عايش في الأوهام
وكدبت وقولت أكيد هتروق
وفي حلمي لقيتني إن أنا عريان
فقالولي اتغطى تكون بردان
يا اخواتي هاتجنن والله
دا أنا شوفت النحلة اسبايدر مان
وكمان باتمان على شكل حصان
اياكوا تقولوا ان أنا تعبان
أو عقلي مهيس م البرشام
اسم الله عليك دا إنت بتنجان
ترللي وعايش في التوهان
والله قرفان زهقان طهقان
م الدنيا خلاص هايجيلي جنان
هو انتوا يا عالم مش شايفين؟؟
دانا قالب وشي على مرايتين
الأولى بتبص على يميني
ويمين بالله النحس راكبني
جالها السرطان
والتانية تبص على شمالى
وتقولي اسم الله يا نور عيني
ويمين بالله كرهت سنيني
طبق الميلامين يقلب صيني
ما تردوا عليا تشوروا بإيه؟؟
معقولة أنا عاقل ولا دا إيه؟؟
ولا أنا مجنون وضحكتوا عليه؟؟
يا اخواتي خلاص ولا عاد إخلاص
مليون وسواس ومفيش حراس
ودماغي قافلها بميت ترباس
ودا يطلع إيه ترللي يا بيه
ولا أنت خلاص عقلك حساس
فوت ومعادش يساوي جنيه
اسم الله عليه اسم الله عليه
هو دا كل اللي قدرتوا عليه
يعني أنا مجنون وبقيت شمشون؟؟
ولا أنا وأنا نايم جه المأذون
جوزني وعقلي دا جاله جنان
أنا خايف فعلا أكون عريان
والحلم دا باطل في التوهان
طب أقولك إيه؟؟
يا سعات البيه
اتغطى كويس يلا ونام
وبلاش من تاني تنام عريان
،،،،،،،،،،،،،،،،،،،،،،،،،،،،،،،،،،،،،،،،،،،،
معقول أنا توهت من العنوان؟؟!
،،،،،،،،،،،،،،،،،،،،،،،،،،،،،،،،،،،،،،،،،،،،
كلمات الشاعر
سامح السبكى
،،،،،،،،،،،،،،،،،،،،،،،،،،،،،،،،،،،،،،،،،،،،