أنا زعلان
بس انا زعلان
واخد علي خاطرى وفيه جوايا من الأحزان
أنواع لساها يادوبك خام
زعلان
مش عاوز ارمى كلام ولا حتى سلام
ولا افاصل حتى مع الأيام واقول دى بكام
زعلان
من غير تمييز وخلاص
زعلان
من كله لدرجة انى زعلت من الإحساس
مطلعش مقاس الوجع الكامن ف ضلوعى
ملقيتش حواس
تقدر تستحمل أوجاعى وتعبر عنها
معادش مكان
(من حرب إيران لبسنت لضيق العيش )
غير عزة وأقصى مشاعرفيها مبتقضيش
الناس اللي بتصرخ خايفين
صرَّخوا بشويش
أنا زعلان م الدنيا ومن أى زمان
زعلان
من ناس كانوا اصحابي ومبقوش اصحاب
ولغيت صداقتهم معملتش أيتها حساب
العيش إن هان الملح كمان بيهون وياه
وتهون الدنيا بحالها معاه
زعلان
من بكره اللي هيجى ومالوش عنوان
زعلان والله من الأحزان
مفيهاش تعريف ينفع ليا ملهاش نية…
زعلان
علي نفسي اللي بتهرب منى وبتغيب
زعلان
و باشوف إنه الزعل المعلن مش عيب
زعلان
من مصر بكل مافيها
الفقر الجهل المرض الخوف
زعلان
والأمر بنشر الغل… بيعدل أمرك بالمعروف
زعلان جدا
مش عاوز أى آدان يدن
علشان ف الأصل م بنصليش
زعلان
على قلبي اللي بيطمع يكبر ويعيش
من أكبر حد لأصغر حد لأقرب واحد قالك هاجى
وهوه مربط مع أيامه عشان ميجيش
زعلان من إيه بالظبط إن جيت تسألنى
ماهعرف ارد غير انه مفيش
زعلان وبجد
زعلان بطريقة اكبر من كونها تخض
زعلان من كل حاجات الكون
الحر.. البرد.. السبت… الحد… ومن امبارح ومن الغد…..زعلان م الورد
اللي سمح لنا نعمله تقليد
زعلان من نفسي وبالتحديد زعلان م العيد
مبقاش يستنى يصلي العصر
زعلان م الحب وأيامه وطريقته وصبحه وأحلامه
زعلان من لمسته وكلامه اللي مبيدفيش
زعلان من طعمه مبيكفيش
أيتها عيون
زعلان من نفسي لأنى باخون الشعر
ولسه بحاول اترجاه
واكتب أحاسيس مش ماشيه معاه
زعلان وهاموت
ولو انا قررت أعدى وافوت
وأصبَّر نفسي بنص حديث وآيات حكم ومواعظ عن لقمان
بالاقينى زعلت كمان وكمان
زعلان
والزعل الدنيا مهيش سايعاه
زعلان لله
كلمات الشاعر
حمدى موسى
