شقلبية كراسي: حين يتحول النمور.. إلى موظف طابور!
كتب: أشرف كمال
الشخصيات:
النمس: (نائب رئيس المركز “السابق”)، يرتدي بدلة كانت لامعة، لكن ملامحه الآن مطفأة، يلملم أغراضه في كرتونة “شيبسي” قديمة.
عم شمردل: (موظف قديم وعاصر “عصور الجوع” قبل الأبراج)، يجلس على ركن المكتب ويشرب شاي “كشري” في كوب مكسور اليد.
(المكان: مكتب فخم بطلة على النيل، تكييف يصفر بهدوء، وصور تذكارية للنمس وهو يقص شريط افتتاح “سبيل مياه” وهمي.. النمس يضع “مبخرة” صيني في الكرتونة بحسرة).
عم شمردل (بابتسابة صفراء): خطوة عزيزة يا “نمس بيه”.. قصدي يا “أستاذ نيمو”.. نورت صالة الموظفين تحت في البدروم.. والله العظيم الكرسي الجلد ده كان حاسس إنك تقيل عليه، فقرر “ينفضك” عشان يريح شوية.
النمس (بينفخ بضيق وهو يمسح عرق جبهته): جرا إيه يا شمردل؟ أنت هتتمنظر عليا؟ ده مجرد “تعديل مسار” إداري.. يعني استراحة محارب، وبكرة الأمور توضح وأرجع أهز البلد دي تاني بكلمة مني.
عم شمردل (بيشفط الشاي بصوت عالي “تشششش”): تهزها؟ ده أنت هزيت “ميزانية المحافظة” كلها يا راجل! ده البرج اللي بنيته على النيل بقى أطول من “برج إيفل” بس بنكهة الفساد العصامي. الناس في المنيا بتقول إن السمك في النيل بقى بيطلع يلقط صور “سيلفي” مع البرج بتاعك من كتر ما هو “واخد راحته” ونازل يشرب من المالح!
النمس (بيحاول يلم كرامته وهو بيحط دباسة في الكرتونة): ده عصاميّة يا جاهل.. ده استثمار للمستقبل.. أنا كنت بستر قدميا من عورة الزمن وغدر الأيام!
عم شمردل (بيضحك لدرجة إن الشاي كاد يخرج من أنفه): تستر قدميك؟ ده أنت أول ما استلمت الوظيفة كنت بتمشي بـ “فردة يمين” غير “الفردة الشمال”، والشراب كان “منور” من قدام لدرجة إننا كنا بنعرف “بصمتك” من صوابع رجلك! دلوقتي بقى برج؟ وأراضي وضع يد؟ يا أخي ده أنت شلت “الحدود” اللي بين جنينتك وبين ملك الحكومة بـ “أستيكة” خريطة!
النمس (وهو بيحاول يشيل “أباجورة” مطلية دهب): أنا كنت قيادي.. والقيادي لازم يكون له “بريستيج” يملأ العين.
عم شمردل (بيقف ويعدل طاقيته): البريستيج طار يا “نيمو”! دلوقتي هتنزل تقعد تحت في المكتب اللي جنب “الحمام”، المروحة بتاعته بتعمل صوت “طيارة هليكوبتر” بس مبتطلعش هوا، والكرسي بتاعه برجل واحدة.. يعني لازم توازن نفسك طول الـ 8 ساعات عشان ما تقعش على قفاك.. أهو تتدرب على “التوازن المالي” اللي ضيعته مننا في البرج.
النمس (بمرارة وهو بيشيل الكرتونة): دي “ضربة معلم” اللي عملها فيا المحافظ.. قطع عيشي وكسر فرحتي بالبرج.
عم شمردل (بيفتح الدرج وبيرمي فيه دوسيهات قديمة ومتربة): الأيام دارت يا حبيبي، والترس “قفش” في الفساد. ياللا يا أستاذ نمس، الكرتونة تقيلة عليك؟ تحب أجيبلك “ونش” من اللي كنت بتبني بيه البرج على أرض الدولة عشان ينزلهالك الدور الأرضي؟
النمس (يخرج وهو يبرطم): حسبنا الله ونعم الوكيل.. مفيش تقدير للكوادر العصامية!
عم شمردل (ينادي وراه): متنساش تمضي “دفتر الحضور” بالدقيقة يا نجم.. والغياب بخصم من الحوافز.. إحنا دلوقتي في “دولة القانون” مش في “عزبة النمس”!
