أصلي ازاي
وانا زهني شارد نساي
بتيجي الواردة والشاردة
ويتخانقوا على فكرة
واشوف أحداث
ماليها أساس
وعيني تزوغ عن القبلة
وإيدي تحرك الدبلة
واصيد التايهه بالنبلة
تجيلي الدنيا في الركعة
أجمع فيها اظبطها
في غمرة شغلي فنسيتها
في سجدة جت فضمتها
بحسبة بيرما حلتها
وكام ركعة وكام ساعة
صلاة إيه اللي صليتها
وواخداني الحياة بيتها
تقلبني على شوكها
في حضن اللهو ضمتها
وطبع الدنيا يغلبها
عزيز الحر يهجرها
تجيله رغم سطوتها
تقدمله قرابينها وتعرضله
مفاتنها ولا تشغل
في ذرة ثانية تفكيره
دي بياعة وكيادة
لا ليها ميعاد ولاساعة
…. أصلي ازاي…؟!
وانا واكل حقوق غيري
بطمني في تقصيري
يقين راسخ في تكويني
راح أجبر بعدي عن ديني
واصلي صلاة تكَفِّيني
وارد حقوق لناس ماتت
وناس عاشت
وابرأ ذمتي وديني
وعهد أخذته يحييني
يطوِّل عمري يديني
واشوف يوم ورا التاني
ذنوبي لسه قتلاني
بعيش الوهم سايباني
ف إيد الظلم طلقاني
بتوعدني تطمني
بتوبة جديدة تغسلني
هيغفر لك
ولو تفضل في عصيانك
بستره رغم تقصيري
قصاد الناس مغطّيني
…. أصلّي ازاي….؟
وانا ماشي في كام سكة
بحب الصورة واللقطة
صحيفتي فيها كام سقطة
شِيطاني بتعجبه الفكة
بيعمل بيها كام تكة
يفكك بيها تحصيني
ينسِّيني كتاب ربي وترتيلي
ويمدحني على أدبي
رصيد الطاعة يكفيني
وكل الناس بتدعيلي
رياء الفعل يرجمني
هباء الأجر ضيعني
وكان ضامن لإفلاسي
عبادتك سيب لها ساعة
لحظك خد كمان ساعة
وبين الساعة والساعة
لكاس الدنيا خد ساعة
يا تبقى في ذنب يخسفنا
بكام حجه وشماعة
ياتبقى في طاعة طواعة
تاخدنا لجنة المولى
خلود دائم بلا ساعة
أصلي أزاي
كلمات الشاعر
وحيد علي الجمال
