……………………….
تسليت والنهر واله المطر
…………………….
تسليت مبقتش انا حمل الوجع
حمل الغياب
حمل جفاف النهر وعوار السراب
كل الزهور في حديقة الحب القديمة
لونها طعم الحزن وكسيها الضباب
……………………..
تسليت انا ابن القدر
فعيوني غيمة من مطر
لوحة لتضاريس العمي
زي السما
ف عز الشتا
لما يكون طلق المطر
زلزال عواصف بالرحم
وقت ولادة دمعتي الموت حضر
والضحكه في حواري العيون
قدام عيوني تحتضر
……………………….
تسليت انا الواقف ببابك
انا اللي حركت المطر
علشان يرطب شقشقات الأرض
تطرح منها زهرة شبابك
وأنا اللى حطمني الجفا
وأنا اللى من صلبي اتولد
حب وحبات الوفا
حرمت قلبي ع البنات من يوم غيابك
………………………..
تسليت انا آلة المطر
انا إللى حارس ضحكتك
ولا مرة عكرها الخطر
انا إللى شكلت الزهور
وأنا اللى مالي بدمعتي كل البحور
وأنا اللى عشقك
قبل ما تدوس المحبة
خطوة في أرض البشر
…………………….
تسليت باكتبلك هنا آخر جواب
انا قلبي قلعة من الأمل
بيدكها أسطول عذاب
وعيونك الحالمة يوماتي بقوس قزح
هيغطى الوانة السحاب
……………………….
تسليت حصان الوقت أسرع م الفلاش
كل بنات النهر ماتوا قبل منك
والنهر اتماسك وعاش
ارفعي شال الحرير
عن جسمك المليان حظر
اعشقي النهر اللى ضمك بين ضلوعة
وخاف عليكي من قساوة الحجر
تسليت خلاص نزل الستار
امتثلي لحكم القدر
النهر وطنك واللي حكمة
حب واله المطر
كلمات الشاعر / حمادة عركز
Hamada Arkz
Discussion about this post