ليه
.. ليه ؟
إن كان مسموح لي
أقول لك ليه؟
كسرتِى ضلوعى وسايبانى
والدم النازف من روحى
يلضم كام شارع م التانى
ولا جيتِى ف مرة سألتينى
كام حاجة ف بعدِك واجعانى
ولا قلتى كلام م اللى يطمن
وخنقتى النبض ف شريانى
كدبتِى عيونى ومش باكدب
شوفتك وما كنتيش شايفانى
واخدتك منك واتاريكِى
منك واخداكِ وواخدانى
رغم ان الفيلم طويل جدًا
ما أخدتش منك دور تانى
مثلتى مشاهد مش شبهك
فما كانشِ المشهد إنسانى
وبقيت كومبارس لكن خايب
والدور كان واحد بيعانى
واقف من خيبته وبيفسر
حدوته بطلها واحد تانى
صامت وعيونه بتشرح لك
مع آخر فركش وحشانى
كلمات الشاعر
محمد المساعيدى
