《 أبو مخطا 》

{ قصيدة زجل }

مَاني جايْ تاامدَح بحالي

وعند الشعر في لي كعبْ عالي

ومابدي قول إنو الشعر بيدَر

غْلالو الوافرة فَضْلِةْ غْلالي

بدي قول ليش نْجيبْ أزعَر

عايش بالشقاوة والضلالي

نْحطُّو بإسمْ شاعر فوق منبر

بين ملوكْ شعر الارتجالي

يضرُبْ بالفصاحة بسيف عنتر

ويهجُمْ متل بو زيد الهلالي

وإذا وَصَّل لحرف الجر يسكَر

وينصُبْ كل كلمة بالمقالي

وجَزمو بعد حرف النصب أخطَر

ورَفعو بموضِع النصبْ المثالي

ومافي بيت قالو مو مكسَّر

وشطر مافي من الأخطاء خالي

هيدا واحد مطبَّل مزمَّر

ومتصَدَّر بِموقف احتفالي

معقول الشعر هلقد يزغر

بعد ماكان مجدو صَرح عالي ؟

مين الْ خطط ونفَّذ وقرر

يطعمي الضيفْ من صحن الفْضَالي ؟

معقول الكرامة تضل تخسر

ويْصَفِّي الندلْ شخصا المثالي ؟

الْ عَمْ بيألِّفْ الشعراء أخطَر

على الأوطان من شيخ الضلالي

بِرَبْ الشعر عَمَّا الناس تكفَر

كِتر ماسَيَّدِتْ بعضا المَوالي

بيكْفِي زَعرَنةْ عَ أهل عبقَر

عَمَلتو من رخيصْ السعر غالي

عَ دربْ الشعر لازِمْ ألفْ مخفر

ويعمل محكمة (حكم العدالي)

الْ مُو موهوبْ يفتح فيه محضَر

وتهمتو بالخيانة والعَمالي

الشهادة الْ حاملا في مينْ زَوَّر

وراسِبْ بِصفوفْ الإنتقالي

( أبو مخطا ) وصَفَّا عم بيفخَر

كأنُّو شي نبي مأدَّا رسالي

حرام الوطن بالشعَّار يزغَر

وحتى يعود مجد الشعر لازم

الوطن مايقبل بهيكي حُثالي

.أحمد محمود حسن