اتغيّرت ؟

عينيك بصموا علي حكايتي

تروس تجاعيد ..

وبتنبّت

علي الحواديت وانا باحكيك

واطرّز فيك جناح ألوان ..

وكل ما ابُص في مرايتي أبان غيري

👈وصوتي كمان؟..

..

عشان الرد جوه الروح بيعمل حالة م الهذيان

وم الحيرة ..وم الغيرة..

وميكس غريب من الاحزان

وانت في دنيتي وحدك ..

وحدّك جزّ قلبي وداس

عكست في عينيّ تفسيري

بكيت امتي ؟

…

من لحظة ما اتقتلت حنين ..وكان عفريتي بيطاردك

كان مسكين وشايل قلبه فـ اكياس بخت ..

وعزفك ع القلوب ..غنوات

من لحظة م الكلام فضّوه..وعبّوا سُكااات

واختلطت  فـ عين الناس خطوط سِيري

بتوحشني ؟..

…

ولااااا يمكن ..عبيطة حضرتي وهاشتاق؟

هاعيد  تاني كناياتي ؟

وهاقطف من شجر قلبي المعاني البِكر واتمعشق

ويرموني بهوي وجنون ..

وابقي محِلّي كما دلوقت ..

عصافير هواك اللي فـ ايديّ.. قالوا لي يا هبلة ما تطيري

نفسي فـ ايه؟؟؟

…

ولاااا حاجه.. نفسي ارجع ورا سنتين ..

وتعمي عيوني قبل ما تطُرفك ..وتميل ..

وقبل السهم ما يخيّش في طير روحي

وقبل ما ابقي تفعيلة لبحر هواك ..

نفسي انساك ..واقابلك تاني م الاول ..

وهاعمل نفسي مش شايفاك .. وهاظبط حرف تعبيري

كرهتك ؟..

…

ليه عشان كدّاب ؟؟ ..وماله يا عم

دا نُص الكدابين نجيوا..ونص النص بقوا قدوة

يعضوا فـ بعض فـ الشارع ..ويحضنوا بعض فـ الندوة

هتيجي عليييك ؟ ..

لكني باكرهك جدا ..كل ما قلبي يسألني .. ويلف الكلام حواليك..

واجاوبه برد تحذيري

هيحصل ايه؟..

..

وايه ما حصلش؟؟ .. دا انا اتعرّيت في عين الناس

وسترت مشاعري بوجودك

يقولوا عليك .. بدون ما اسمع اقول ما حصلش

واكذّبهم  قصاد عيني .. لأجل تحن ..وتآمن

ما باوزنهاش..لكن اسفة .. طِلعت كتير عديم احساس

خسارة ارمي ورقي عليك .. واقف ع الواحدة لضميري

👈وآخرتها؟؟..

..

دي اخرتها ..قفلت كتابي علي صورتك وحواديتهم

وقصقصت جناحات قلبي .وقلعت شجرهم البهتان

ونمت صحيت ومالقتنيش ..ومش عارفة الوجع من فين

باشوف الناس بعين تانية ..وباسمع نبرة الشمتان في ضحكاتهم

وباشوفك نسخة بالكربون لحد قابلته ما عرفتوش ..

اخد قلبي ورماه في البحر ..

وشادد حيله ع الباقي في تكويني

…

ووالله لو هاموت دلوقت  ..لـ ابكي لربنا واقول له

تعبني الصبر  والقسمة وقهر وظلم ومكابرة

..

هاقول  له  يارب  اجري عليك .. وعوضي عليك ..

وحقي  راح اخده في الآخرة.

……………

حقي راح اخده فـ الآخرة.

كلمات الشاعرة

عفاف أحمد التركى