سايق عليكى النبى …
كلمات الشاعر
عبد الرحيم على
سايق عليكى النبى …
____________
سايق عليكى النبى
بالرحمة تدعيلى
عاشق غوانى الهوى
وباغنى مواويلى
حبك وعشقك قدر
على الجبين مكتوب
وانا اللى مِنُّه ما اتوب
لو طفّوا قنديلى
دليلى فيكى احتار
يا مقلّبه جيبي
العيب فى اهل الهوى
والا الهوى عيبى
نحلتى منى الوبر
ولا كانش عندك خبر
نفسي فى يوم انستر
سيبى كراكيبى
كل الأحبة اتنين
والكل عاشقينك
يا مجمعه الاحباب
على شوق محبينك
هواكى ليه جبار
عذابه ليل ونهار
ولا تقبليش اعذار
ياك ربنا يعينك
قالوا أن حبك نار
وانا اللى قلبى احتار
لاجلك ركبت الموج
ومشيت مع التيار
أكونشى فاهم غلط!
لأجلك بلعت الزلط
عقد المحبة انفرط
وانا اللى قلبى اختار
وسية فيها العجب
محاسيب ولعّيبة
فيها اللى ضهره انكسر
وفيها ركّيبة
واللى ضميره اختفى
ما صانش يوم الوفا
قفا يناطع قفا
بيعبّى فى زكيبة
كلمات الشاعر
عبد الرحيم على
Abdelrahimaly
رفعت للتصميم
