منيش زعلانة

جمعت امالي بين ايدك وحطيتها

وجبت الروح على ميضتك ووضيتها

وسلفت الزمن عمري عشان خاطرك

وعبيت م السنين شنطة وفضيتها

……..

منيش زعلانة ع الشيبة ولا التجاعيد

ولا صيامي مادام بعده هصلي العيد

ولا على ضهر من بعد الوقوف محني

مادمت ياروحي متهني مادمت سعيد

…….

دانا كفاية ان انا شوفتك ياروحي كبير

داعمر الميه ما بتطلع بدون البير

وانا لو عمري راح يرجع كمان مرة

هكون لك وردة بتفوح لك عطور وعبير

…..

فتحت لقلبي شباكه وعليك راح ابص

لحد نهاري ما يسلم غروب الشمس

وهبعت روحي تطمن تملي عليك

واسلم بيك على كفوف الشعور والنفس!

……….

تعالى امسك على ايدي وبوس فيها

وخد م القلب احساسه وحنّيها

وطبطب لي على بواقي سنين عمري

وخليني اعيشها معاك واقضّيها

……..

ولو سوط المرض علم على جسمي

بلاش يبقى الشعور بينا كده رسمي

وفكرني بكلامي معاك وانا بصرخ

يا واد انطق بقا اسمي!

كلمات الشاعر

سمير محمود