كلمات الشاعر
سمير محمود
هواكي خديعة …
هواكي خديعة ومقلب شربته
وقلبي اللي حبك معدتيش حبيبته
انا بعتذر لك لاني هويتك
ووعدي اللي قولته ف حبك سحبته!
…..
لاني ف حبك حقيقي اتخدعت
وقلبي رميته ف ايديكي وخضعت
طلعتي ضليعة ف كسر القلوب
وبعتي وعمري ماخنتك وبعت!
…….
حلفتي بإن اللي بينا كبير
لكنّي ف هواكي مكنتش خبير
فرحت بكلامك وعشت ف سرور
اتاري وفاءك ده نقطة ف بير!
…..
مادمتي نويتي وواخدة القرار
ماكنتي تسيبي النجوم ف المدار
وكنتي تسيبي الشموس ف الغروب
ف غيرك تواسي هروب النهار!
……
خسارة المشاعر وكل اللي كان
وشوقنا اللي ريحته ف ايد المكان
وفرحة عينيكي بكلمك( بحبِك)
وفرحي بجملة( بحبَك كمان)!
…..
خسارة الكلام اللي قولته عليكي
خسارة الحنين اللي كلم عينيكي
خسارة الحروف اللي كتبت قصيدة
ف لحظة شفايفي ماباست ايديكي!
……..
برافو عليكي يا واخدة امتياز
لانك قدرتي تبيعي العُزاز
لانك قدرتي ف عز الهشاشة
تكوني الفريدة ف كسر الفولاذ!
…..
فروحي لغيري ومارسي الطقوس
وصبي بظلامك في اتخن شموس
وقولي وعيدي ف نفس الكلام
صحيح الخيانة دي علم ودروس!
كلمات الشاعر
سمير محمود
Discussion about this post