كلمات الشاعر
حمدى موسى
حتة صابحة
………………….
المشاعر لو رزينة فالمعانى مش مطاوعة
والحروف بنت الحزينة نص عطشى ونص جوعى
والقلم ابن الذين كلمتين ويقولك اوعى
بدي فرصة أقول باحبك خاصةً…
إحساسي روعة
اسمعينى ……
لما اكون عاوز افضفض الحقينى بالحنان
واما اكون عاوز أعبر بس مش لاقي الآمان
جرجرينى لحتة ضلة وافتحيلي الشوق ميدان
وان لقيتى الروح بتعرق…أدركينى بالآدان
افهمينى
قلبي له إحساس لوحده مختلف عن باقي جيله
عمره أقصر من مشاعره وراضى م الحب بقليله
قلبي أُسْرى به قصيدة م الهوى لحد الشهادة
ثم نادى فيه منادى … قام بسرعة وشد حيله
يبنى للشوق دار عبادة
صدقينى
الحب مابيجيش بخطة
الحواس الخمسة..خمسة عمرهم ماهيبقوا ستة
فانتى خلينى أحبك غصب عنى مش بشوقى
خلي قلبي يثور عليا …يقول حقوقى
سيبى روحى تشَّهِد الأيام عليا
يطلبونى بحقهم المرمى فيا
يرجمونى عشان كتير الصمت من شر البلية
وان شافونى توهت بين شكى ويقينى
يعذروا عيونى الجميلة المجدلية
الهوى ف الروح ضرورة
إنما الأحلام غرورة
والحقيقة لسه فى عنق القارورة
انما القصة بشخوصها…بالأماكن وبطقوسها
بالحكاية وبدروسها…. أمرهم ف الحب شورى
هى صورة..بس صورة أولية
مفردات الحب فاكرة انها فاهمة القصيدة
والقصيدة مش كلام ولا بالعلام
والغرام عمره ماكان بالمفهومية
اعذرينى…
قلبي فيه م الحزن ذبحة
من زمان عمال ادور ف البكا على حتة صابحة
طعمها يغير مرار الصبر احس بطعم فرحة…
وانسي روحى ف الخلية
يمكن الدنيا تلاقينى..
كلمات الشاعر
حمدى موسى
Discussion about this post