مساء الخير يا كل الخير ..

كلمات الشاعر

عماد مهران

مساء الخير يا كل الخير ..

يا أول فرحة المشاوير .. يا شغلاني ..

يا روحي الحلوة مهما بغيب بحسك برضو شايفاني ..

واحشني الضحك وياكي .. بقالك مدة مضحكتيش ..

بحسك وانتي زعلانة .. بحس الدنيا ما بتمشيش ..

كفاية دموع .. وهي الدنيا دي تساوي دموع عينك

ما ياما وقولنا ما بتديش ..

تعالي نغير الحزن اللي في عيونك ..

يا بنت الروح .. مفيش غيرك مفيش في عيوني غير لونك ..

بحبك قد ما الحلم اللي فينا جميل .. وقد ما عمرنا بيجري ..

بحبك قد ما اتمنيت تكوني فرحتي وقدري ..

بحبك وانتي عارفة ازاي وعارفة أن انتي وحشاني ..

بحبك اضحكي تاني ..

وكل ما اقولها تبتسمي ..

بحبك تنتهي المسافات .. بحبك عيشي واترسمي ..

وهي الدنيا دي تتعاش ولا تتحس من غيرك ..

ده لما بقول مساء الخير بكون قصدي مساء خيرك ..

يا بنت الروح ..

يا حظي الحلو في الدنيا وضحكة وشي في التصاوير ..

مسائك خير ..

—

كلمات الشاعر

عماد مهران

Emad Mahran