كلمات الشاعر 

سعد الشرقاوى

هدّي يا دنيا..

هدّي يا دنيا شويّه علينا

دي الايّام بتعاند فينا

يوم ورا يوم بتفوتي يا دنيا

واحنا بنضحك على بعضينا

هدّي يا دنيا شويّه علينا

        ,,,

هدّي يا دنيا ف عرضك هدّي

إرحمي دمعة عيني و رٌدّي

ما احنا بكينا ابويا وجدي

طاب مين بكره ح يبكي علينا

هدّي يا دنيا شويّه علينا

      ,,,

هدّي يا دنيا كفايه مزاوله

وانتي الفايزه ف آخر الجولة

وبتسقينا المٌر على أولى

والمشاريب محسوبة علينا

هدّي يا دنيا شويّه علينا

       ,,,

هاتي يا دنيا دقيقة سعادة

يا لليّ الحزن ف طبعك عادة

دي الأحزان لوْ جات بزيادة

كل الخلق بتشمت فينا

هدّي يا دنيا شويّه علينا

        ,,,

هدّي يا دنيا العمر بيجري

وأنا فارد للأيّام حجري

بانتظرك بالعام الهجري

ولا جيتي بحاجة تسرّينا

هدّي يا دنيا شويّه علينا

      ,,,

هدّي يا دنيا قساوتك مرّه

يمكن ننسى العيشة المُرّه

دي الافراح بتسافر برّه

والاحزان سكنت جنبينا

هديّ يا دنيا شوية علينا

      ,,,

هدّي يا دنيا وريّحي بالك

دا الليّ تعبنا الجري قبالك

قادر ربيّ يغيّر حالك

تجري ورانا عشان تدّينا

هدّي يا دنيا شويّه علينا

 كلمات الشاعر 

سعد الشرقاوى